കുവൈറ്റ് : കുവൈറ്റില് നിന്നുള്ള തീര്ത്ഥാടകരെ ലക്ഷ്യമിട്ട് ജസീറ എയര്വെയ്സ് സൗദിയിലേക്ക് പുതിയ വിമാനസര്വ്വീസ് ആരംഭിച്ചു .ആഴ്ചയിൽ മൂന്നു സർവിസുകളാണ് ഉണ്ടാവുകയെന്ന് സി.ഇ.ഒ രോഹിത് രാമചന്ദ്രൻ പറഞ്ഞു. ഏപ്രിൽ 30 വരെ ചൊവ്വ, വ്യാഴം, ശനി ദിവസങ്ങളിൽ കുവൈത്തിൽനിന്ന് രാവിലെ 6.15ന് പുറപ്പെട്ട് മദീനയിലെ പ്രിൻസ് മുഹമ്മദ് ബിൻ അബ്ദുൽ അസീസ് വിമാനത്താവളത്തിൽ എട്ടുമണിക്ക് എത്തുകയും തിരിച്ച് മദീനയിൽനിന്ന് 8.45ന് പുറപ്പെട്ട് 10.30ന് കുവൈത്തിൽ എത്തുകയും ചെയ്യുന്ന രീതിയിലാണ് സർവിസ് ക്രമീകരിച്ചിട്ടുള്ളത്.
മേയ് ഒന്നുമുതൽ ഒക്ടോബർ 27 വരെ തിങ്കൾ, ബുധൻ, ഞായർ ദിവസങ്ങളിൽ കുവൈത്തിൽനിന്ന് രാവിലെ 10.15ന് പുറപ്പെട്ട് 12ന് മദീനയിൽ എത്തുന്ന രീതിയിലാണ് ക്രമീകരണം.
റമദാനോടനുബന്ധിച്ച് മേയ് 16 മുതൽ ജൂൺ ആറുവരെ ത്വാഇഫിലേക്ക് സർവിസ് പുനരാരംഭിക്കുമെന്നും ബന്ധപ്പെട്ടവർ വ്യക്തമാക്കി. ശനി ഒഴികെയുള്ള ദിവസങ്ങളിൽ രാവിലെ 6.05ന് കുവൈത്തിൽനിന്ന് പുറപ്പെട്ട് 8.10ന് ത്വാഇഫിൽ എത്തുന്ന രീതിയിലാണ് ഇൗ സർവിസ്.