ശ്രീനഗർ: ജമ്മു കാശ്മീർ സന്ദർശനത്തിന് എത്തിയ രാഹുൽ ഗാന്ധിയോടു പരാതി പറഞ്ഞ് യാത്രക്കാരി. രാഹുൽ ഗാന്ധി അടക്കമുള്ള പ്രതിപക്ഷ നേതാക്കൾ സഞ്ചരിച്ച വിമാനത്തിൽ യാത്ര ചെയ്ത കാശ്മീരുകാരിയായ സ്ത്രീയാണ് രാഹുൽ ഗാന്ധിക്കു മുന്പിൽ പരാതിക്കെട്ടഴിച്ചത്.
ആർട്ടിക്കിൾ 370 റദ്ദാക്കിയതുമായി ബന്ധപ്പെട്ടുണ്ടായ സംഭവങ്ങൾ വളരെ വൈകാരികമായാണ് സ്ത്രീ രാഹുൽ ഗാന്ധിയോടു വിവരിക്കുന്നത്. ജമ്മു കാശ്മീരിലെ സ്ഥിതി സാധാരണനിലയിലല്ലെന്ന് ഇവർ രാഹുലിനോാടു പറയുന്നു. ഞങ്ങളുടെ കുട്ടികൾക്ക് വീടുകളിൽനിന്നു പുറത്തിറങ്ങാൻ കഴിയുന്നില്ല.
താഴ്വര അശാന്തമാണ്. എന്റെ സഹോദരന് ഹൃദയ സംബന്ധമായ രോഗങ്ങളുണ്ട്. എന്നാൽ, അദ്ദേഹത്തിന് കഴിഞ്ഞ പത്ത് ദിവസമായി ഡോക്ടറെ കാണാൻ പോലും പറ്റിയിട്ടില്ല. ഞങ്ങൾ ആകെ പ്രശ്നത്തിലാണ്- എന്നിങ്ങനെ സ്ത്രീ പറയുന്നതാണ് ദൃശ്യങ്ങളിൽ കാണാനാകുക.
ഇതിന്റെ വീഡിയോ ദൃശ്യങ്ങൾ പുറത്തുവന്നു. കാര്യങ്ങൾ പറയുന്നതിനിടെ സ്ത്രീ പൊട്ടിക്കരയുകയും സ്വരമുയർത്തി സംസാരിക്കുകയും ചെയ്യുന്നുണ്ട്. സ്ത്രീയുടെ പരാതി രാഹുൽ ശാന്തനായി കേൾക്കുകയാണെങ്കിലും വിമാനത്തിൽ ഒപ്പമുണ്ടായിരുന്ന ഇന്ത്യാടുഡേ റിപ്പോർട്ടർ പല്ലവി ഘോഷ് ഇവരെ തിരിച്ചയയ്ക്കാൻ ശ്രമിക്കുന്നുണ്ട്.