ബാംഗ്ലൂര് : പ്രതിസന്ധികളെ നിഷ്പ്രയാസം അതിജീവിച്ചിട്ടുള്ള ചരിത്രമാണ് നൂറ്റാണ്ടുപിന്നിട്ട കോണ്ഗ്രസിനുള്ളതെന്നും കര്ണ്ണാടക പ്രതിസന്ധിയും പാര്ട്ടി അതിജീവിക്കുമെന്നും സംഘടനാ ചുമതലയുള്ള എ ഐ സി സി ജനറല്സെക്രട്ടറി കെ സി വേണുഗോപാല്.
സ്പീക്കര്ക്ക് സഭയ്ക്കുള്ളില് വിവേചനാധികാരത്തോടെ പ്രവര്ത്തിക്കാനുള്ള അനുമതി സുപ്രീംകോടതി നല്കുമെന്നാണ് കരുതുന്നത് . പാര്ട്ടിക്ക് കോടതിയിലാണ് വിശ്വാസം.
സര്ക്കാരിനെ അട്ടിമറിക്കാനുള്ള ബിജെപിയുടെ ശ്രമങ്ങള് വിലപ്പോവില്ലെന്ന് ഒരിക്കല്ക്കൂടി തെളിയിക്കപ്പെടാന് പോകുകയാണ് - അദ്ദേഹം പറഞ്ഞു. ബാംഗ്ലൂര് കുമാരകൃപയില് മാധ്യമങ്ങളോട് സംസാരിക്കുകയായിരുന്നു അദ്ദേഹം .
അതിനിടെ ഇവിടെ കൂടി നിന്ന പ്രവര്ത്തകരോട് താഴേത്തട്ട് മുതല് സംഘടനാ സംവിധാനം ഊര്ജ്വസ്വലമാക്കാനുള്ള പ്രവര്ത്തനങ്ങളില് മുഴുകാന് കെ സി വേണുഗോപാല് ആഹ്വാനം ചെയ്തു .
ഏത് പ്രതിസന്ധിയില് നിന്നും പുതിയ ഊര്ജ്ജവും പുതിയ നേതൃത്വവും ഉരിത്തിരിഞ്ഞു വരുന്നതാണ് കോണ്ഗ്രസിന്റെ ചരിത്രം. അതിനായുള്ള പ്രവര്ത്തനങ്ങളിലായിരിക്കണം പ്രവര്ത്തകരുടെ ശ്രദ്ധയെന്നും വേണുഗോപാല് പ്രവര്ത്തകരോടായി ആഹ്വാനം ചെയ്തു.