ഡല്‍ഹി: കെ പി സി സി വര്‍ക്കിംഗ് പ്രസിഡന്റ് കൊടിക്കുന്നില്‍ സുരേഷ് എം പിയ്ക്ക് മാവേലിക്കരയില്‍ വീണ്ടും മത്സരിക്കാന്‍ എ ഐ സി സിയുടെ അനുമതി ലഭിച്ചതായി സൂചന. പാര്‍ട്ടി വര്‍ക്കിംഗ് പ്രസിഡന്റുമാര്‍ മത്സരിക്കില്ലെന്ന മുന്‍ ധാരണയുടെ അടിസ്ഥാനത്തില്‍ കൊടിക്കുന്നില്‍ സുരേഷ് വീണ്ടും മത്സരിക്കില്ലെന്ന് അഭ്യൂഹം ഉണ്ടായിരുന്നു.
/ "publive-image")
എന്നാല്‍ പുതിയ രാഷ്ട്രീയ സാഹചര്യങ്ങളുടെ പശ്ചാത്തലത്തില്‍ കൊടിക്കുന്നില്‍ വീണ്ടും മത്സരിക്കാന്‍ അനുമതി തേടി ഹൈക്കമാന്റിനെ സമീപിക്കുകയായിരുന്നു.
കേന്ദ്രത്തില്‍ യു പി എ സര്‍ക്കാര്‍ വീണ്ടും അധികാരത്തിലെത്തും എന്ന സാഹചര്യം സംജാതമായതോടെയാണ് കൊടിക്കുന്നില്‍ ഉള്‍പ്പെടെ ദേശീയ തലത്തില്‍ മുമ്പ് മാറി നില്‍ക്കാന്‍ തീരുമാനിച്ച പലരും വീണ്ടും ദേശീയ തലത്തില്‍ സജീവമാകാന്‍ തീരുമാനിച്ചത്.
മാത്രമല്ല, കോണ്‍ഗ്രസിലെ പിന്നോക്ക വിഭാഗത്തില്‍ നിന്നുള്ള ഏറ്റവും സീനിയര്‍ നേതാവ് എന്ന നിലയില്‍ പാര്‍ട്ടി അധികാരത്തിലെത്തിയാല്‍ കേന്ദ്ര ക്യാബിനറ്റ് മന്ത്രി സ്ഥാനമാണ് കൊടിക്കുന്നില്‍ പ്രതീക്ഷിക്കുന്നത്. അതിനാല്‍ തന്നെ വീണ്ടും മത്സരിക്കണമെന്ന ആവശ്യത്തില്‍ കൊടിക്കുന്നില്‍ ഉറച്ചു നില്‍ക്കുകയാണ്.
7 തവണ മത്സരിക്കുകയും ഒരിക്കല്‍ കേന്ദ്ര സഹമന്ത്രിയാവുകയും ചെയ്ത കൊടിക്കുന്നിലിനെ മാറ്റി നിര്‍ത്തണമെന്ന ആവശ്യം ഇത്തവണ ഉയര്‍ന്നിട്ടുണ്ട്. എഴുകോണ്‍ നാരായണന്‍, എന്‍ കെ സുധീര്‍ എന്നിവരാണ് ഇവിടെ മത്സരിക്കാന്‍ കാത്തിരിക്കുന്നവര്‍. എന്നാല്‍ കൊടിക്കുന്നില്‍ വീണ്ടും സീറ്റുറപ്പിച്ചതോടെ ഇവര്‍ക്ക് വീണ്ടും കാത്തിരിക്കേണ്ടി വരും.
Follow Us/sathyam/media/agency_attachments/5VspLzgrB7PML1PH6Ix6.png)
