തിരുവനന്തപുരം: മുന് മുഖ്യമന്ത്രി ഉമ്മന്ചാണ്ടിയെ കെ പി സി സി അധ്യക്ഷന് മുതലുള്ള കോണ്ഗ്രസുകാര് സ്നേഹിച്ചുകൊല്ലുകയാണ്. പ്രവര്ത്തകരുടെ സ്നേഹത്തിന് മുമ്പില് മുട്ടുമടക്കുന്ന മനസാണ് ഉമ്മന്ചാണ്ടിക്കെന്നു കോണ്ഗ്രസുകാര്ക്കറിയാം.
അതിനാല് എന്ത് വിലകൊടുത്തും ഇത്തവണ ഉമ്മന്ചാണ്ടിയെ മത്സരിപ്പിച്ച് വിജയിപ്പിച്ച് കേന്ദ്രമന്ത്രിയാക്കാനുള്ള തത്രപ്പാടിലാണ് നേതാക്കള്. പക്ഷേ, ഉമ്മന്ചാണ്ടി ആ സ്നേഹത്തിന് മാത്രം വഴങ്ങില്ലെന്ന ഒറ്റ വാശിയിലാണ്.
എ ഐ സി സി ജനറല് സെക്രട്ടറിയും വര്ക്കിംഗ് കമ്മിറ്റി അംഗവുമായി തെരഞ്ഞെടുക്കപ്പെട്ടത് മുതല് ഉമ്മന്ചാണ്ടിയുടെ ലോക്സഭാ മത്സരം ചര്ച്ച ചെയ്യപ്പെട്ട് തുടങ്ങിയതാണ്. കോട്ടയം അല്ലെങ്കില് ഇടുക്കി എന്നുറപ്പിച്ചവര് ഏറെ.
പക്ഷേ, സ്വന്തം ക്യാമ്പില് നിന്നും ഉണ്ടാകാവുന്ന ചതി മരത്തില് കണ്ടവനാണ് ഉമ്മന്ചാണ്ടി. അതിനാല് തന്നെ എ ഐ സി സി ജനറല് സെക്രട്ടറിയാകുന്ന കാര്യം സംസാരിക്കാന് രാഹുല് ഗാന്ധി ഡല്ഹിക്ക് വിളിച്ചപ്പോഴേ അദ്ദേഹം 'പണി' വരുന്ന വഴി കണ്ടതാണ്.
അന്ന് രാഹുലുമായുള്ള ആദ്യ കൂടിക്കാഴ്ചയില് തന്നെ, 'പാര്ട്ടി ദൌത്യമേല്ക്കാം - പക്ഷേ ഉടന് ലോകസഭയിലേക്ക് വരാന് നിര്ബന്ധിക്കരുതെന്ന്' ഉറപ്പും വാങ്ങിയാണ് മടങ്ങിയത്. ഇല്ലെന്ന് രാഹുല് ഉറപ്പും നല്കിയിരുന്നു. അതിനാല് തന്നെ ഉമ്മന്ചാണ്ടിയുടെ സ്ഥാനാര്ഥിത്വം ചര്ച്ച ചെയ്യപ്പെടുമ്പോള് ഉള്ളില് ചിരിക്കുന്നയാള് ഉമ്മന്ചാണ്ടി തന്നെയാണ്.
തന്നെ ഡല്ഹിക്കയക്കാന് തത്രപ്പെടുന്നവരുടെ സ്നേഹവും ഉള്ളിലിരുപ്പും അദ്ദേഹത്തിന് നന്നായറിയുകയും ചെയ്യാം. പുതുപ്പള്ളിയില് ഈ നിയമസഭാ കാലാവധി തികയ്ക്കും എന്ന ഉറപ്പാണ് അദ്ദേഹം അടുപ്പക്കാര്ക്ക് നല്കിയിരിക്കുന്നത്.