പത്തനംതിട്ട: കേരള സന്ദര്ശന പരിപാടികളില് ശബരിമലയുടെ പേര് പറഞ്ഞ പ്രധാനമന്ത്രി നരേന്ദ്രമോഡിയെ വെട്ടിലാക്കി 'ശബരിമല'യെന്നു പറയാതെ രാഹുല് ഗാന്ധി. ശബരിമലയുടെ പേരില് പന്തളം കൊട്ടാരത്തിന്റെയും എന് എസ് എസിന്റെയും പഴികേട്ട ബി ജെ പിയെയും കേന്ദ്ര സര്ക്കാരിനെയും വെട്ടിലാക്കുന്നതായിരുന്നു പത്തനംതിട്ടയില് രാഹുലിന്റെ പ്രഖ്യാപനം.
'യഥാര്ത്ഥ' വിശ്വാസികള്ക്കൊപ്പമാണ് കോണ്ഗ്രസെന്നായിരുന്നു വിശ്വാസികള്ക്ക് രാഹുലിന്റെ ഉറപ്പ്. 'യഥാര്ത്ഥ' എന്ന പ്രയോഗത്തില് മലചവിട്ടാന് 'കോണ്ട്രാക്റ്റി'ലെത്തിയ 'യുവതി'കളും, സന്നിധാനത്തിന് മുതലെടുപ്പിനെത്തിയ ആര് എസ് എസും ഉള്പ്പെടില്ലെന്നു വ്യക്തം. അനുഷ്ഠാനങ്ങള് പാലിക്കപ്പെടുക തന്നെ വേണമെന്ന് രാഹുല് ഗാന്ധി പറഞ്ഞു. ആചാരങ്ങളെയും വിശ്വാസങ്ങളെയും കോണ്ഗ്രസ് വേദനിപ്പിക്കില്ലെന്നും അദ്ദേഹം പറഞ്ഞു.
വിശ്വാസ സംരക്ഷണത്തിനായി ഓര്ഡിനന്സ് ഇറക്കുമെന്ന് പ്രകടനപത്രികയില് ഉറപ്പ് നല്കണമെന്നാണ് പന്തളം കൊട്ടാരത്തിന്റെയും എന് എസ് എസിന്റെയും ആവശ്യം കേരള സന്ദര്ശനത്തില് ഉറപ്പ് നല്കാന് പ്രധാനമന്ത്രി തയാറായില്ല. എന്നാല് 2 ദിവസം മുമ്പ് തെരഞ്ഞെടുപ്പ് പ്രചരണത്തിനിടെ സംഘടനാ ചുമതലയുള്ള എ ഐ സി സി ജനറല് സെക്രട്ടറി കെ സി വേണുഗോപാല് ഇക്കാര്യത്തില് വിശ്വാസികള്ക്ക് ഉറപ്പ് നല്കുകയു൦ ചെയ്തിരുന്നു.
കോണ്ഗ്രസ് അധികാരത്തിലെത്തിയാല് വിശ്വാസം സംരക്ഷിക്കാന് നടപടി ഉണ്ടാകുമെന്നായിരുന്നു വേണുഗോപാലിന്റെ ഉറപ്പ്. ഇതോടെ ശബരിമല വിഷയത്തില് ഇരട്ടത്താപ്പ് തുടരുന്ന ബി ജെ പി പ്രചരണ രംഗത്തും പ്രതിരോധത്തിലാണ്. അതേസമയം, ഒപ്പമുണ്ടാകുമെന്നും വിശ്വാസം സംരക്ഷിക്കുമെന്നും ഉറപ്പ് നല്കി കോണ്ഗ്രസും രാഹുല് ഗാന്ധിയും ഒരുമുഴം മുന്പേ എറിഞ്ഞുകഴിഞ്ഞു.