തിരുവനന്തപുരം: കോവിഡിന്റെ പശ്ചാത്തലത്തില് സംസ്ഥാനത്തെ സര്ക്കാര് ഓഫീസുകള് പ്രവര്ത്തിക്കുന്നതിന് മാനദണ്ഡമായി. വിവിധ ഹോട്ട്സ്പോട്ടുകളിലെ ഓഫീസുകളില് അതത് ജില്ലയിലെ പരിമിത എണ്ണം ജീവനക്കാരെ ഉപയോഗിച്ച് ദൈനംദിന പ്രവര്ത്തനങ്ങള്ക്കുള്ള ക്രമീകരണങ്ങളാണ് ഏര്പ്പെടുത്തുന്നത്.
കോവിഡ്-19 നിര്വ്യാപന, പ്രതിരോധ പ്രവര്ത്തനങ്ങളുമായി ബന്ധപ്പെട്ട് പ്രവര്ത്തിക്കുന്ന എല്ലാ സര്ക്കാര് ഓഫീസുകളും, സ്ഥാപനങ്ങളും പൂര്ണമായും തുറക്കണം. ഹോട്ട്സ്പോട്ട് ഒഴികെയുള്ള പ്രദേശങ്ങളില് 50ശതമാനം ഉദ്യോഗസ്ഥര് സര്ക്കാര് ഓഫീസുകളില് ഹാജരാകണം. അവശ്യസേവന വകുപ്പുകളിലെ ജീവനക്കാര് എല്ലാ ദിവസവും ഹാജരാകണം.
മറ്റ് ജില്ലകളില് അകപ്പെട്ട ജീവനക്കാര്ക്ക് അവരവരുടെ ജില്ലകളിലേക്ക് മടങ്ങാന് കെഎസ്ആര്ടിസി ബസ് സൗകര്യം അതത് ജില്ലാ കളക്ടര്മാര് ഒരുക്കണം. ഇതിനായി വരുന്ന ഡീസല് ചെലവ് എസ്ഡിആര്എഫില് നിന്ന് കണ്ടെത്തുകയും യാത്രക്കാരില് നിന്ന് ഒരു നിശ്ചിത യാത്രാക്കൂലി ഈടാക്കുകയും വേണം.
ഹോട്ട്സ്പോട്ട് പ്രദേശങ്ങളില് ഉള്പ്പെടുന്ന സ്ഥലമാണെങ്കില്കൂടി സെക്രട്ടേറിയറ്റ്, കളക്ടറേറ്റുകള്, വകുപ്പ് മേധാവികളുടെ ഓഫീസുകള് എന്നിവ 50 ശതമാനം ജീവനക്കാരുമായി പ്രവര്ത്തിക്കണം. തദ്ദേശസ്വയംഭരണസ്ഥാപനങ്ങളില് ജീവനക്കാരുടെ സേവനം ആവശ്യമുണ്ടെങ്കില് തദ്ദേശസ്വയംഭരണ സ്ഥാപനമേധാവികള്ക്ക് ജില്ലാ കളക്ടര്മാരോട് ആവശ്യപ്പെടാം.
ഭിന്നശേഷിക്കാര്, ഗുരുതര രോഗബാധിതര്, ഗര്ഭിണികള്, അഞ്ചു വയസ്സില് താഴെ പ്രായമുള്ള കുട്ടികളുള്ള രക്ഷകര്ത്താക്കള്, ഭിന്നശേഷിക്കാരും- അംഗപരിമിതരുമായ കുട്ടികളുടെ രക്ഷകര്ത്താക്കളായ ഉദ്യോഗസ്ഥര് എന്നിവരെ ഡ്യൂട്ടിയില് നിന്നും പരമാവധി ഒഴിവാക്കണം.