കെ.എം മാണി രൂപം നൽകിയ കരാർ അതേപടി പാലിക്കണമെന്ന് കേരള കോൺഗ്രസ് ജോസ് കെ മാണി വിഭാ​ഗം

കോട്ടയം: കെ.എം മാണി രൂപം നൽകിയ കരാർ അതേപടി പാലിക്കണമെന്നാണ് കേരള കോൺഗ്രസ് ജോസ് കെ മാണി വിഭാഗത്തിന്റെ നിലപാടെന്ന് കേരളാ കോണ്‍ഗ്രസ്സ് (എം)പാര്‍ലമെന്ററി പാര്‍ട്ടി യോഗം.

നിലവിലില്ലാത്ത കരാർ ഉണ്ടെന്ന് സ്ഥാപിച്ചെടുക്കാൻ ജോസഫ് നടത്തുന്ന ശ്രമം രാഷ്ട്രീയ അധാർമികതയാണ്. നിർണായക രാഷ്ട്രീയ ഘട്ടങ്ങളിലെല്ലാം മുന്നണി മാറ്റം എന്ന ഭീഷണി ഉയർത്തുന്ന പി ജെ ജോസഫിന് മുന്നിൽ യു ഡി എഫ് വഴങ്ങരുതെന്നും യോ​ഗം ആവശ്യപ്പെടുന്നു.

മുന്നണി മാറ്റം ശീലമാക്കിയ പി.ജെ ജോസഫ് പതിവുപോലെ ഭീഷണി ആവര്‍ത്തിക്കുകയാണ്.  ഒറ്റ രാത്രി കൊണ്ട് നിലപാടു മാറ്റുന്നവർക്ക് കാലുമാറ്റത്തിന്റെ പാരിതോഷികമായി ഏതെങ്കിലും പദവി നൽകുന്നത് മുന്നണി സംവിധാനത്തെ ദുർബലപ്പെടുത്തുന്നതാണെന്നും യോ​ഗം വിലയിരുത്തി. അത് അംഗീകരിക്കാൻ  കഴിയുന്നതല്ലെന്നും കേരളാ കോണ്‍ഗ്രസ്സ് (എം)പാര്‍ലമെന്ററി പാര്‍ട്ടി യോഗത്തിൽ അഭിപ്രായമുയർന്നു. ചെയര്‍മാന്‍ ജോസ് കെ.മാണി എം.പി അധ്യക്ഷത വഹിച്ച ചടങ്ങിൽ തോമസ് ചാഴികാടന്‍ എം.പി, റോഷി അഗസ്റ്റിന്‍ എം.എല്‍.എ, ഡോ.എന്‍.ജയരാജ് എം.എല്‍.എ, സ്റ്റീഫന്‍ ജോര്‍ജ് എക്‌സ്.എം.എല്‍.എ എന്നിവര്‍ പങ്കെടുത്തു.