കോട്ടയത്ത് ബുള്ളറ്റും പള്‍സറും കൂട്ടിയിടിച്ച് രക്തം വാര്‍ന്ന് മൂന്ന് യുവാക്കള്‍ റോഡില്‍ കിടന്നത് പത്ത് മിനിറ്റ്; അപകടം കണ്ട് ഓടിയെത്തിയെങ്കിലും കൊവിഡ് ഭീതിയില്‍ വെറുതെ നോക്കിനിന്ന് നാട്ടുകാര്‍, ഒടുവില്‍ രണ്ട് യുവാക്കള്‍ക്ക് ദാരുണാന്ത്യം, മൂന്നാമന്‍ വെന്റിലേറ്ററില്‍

കോട്ടയം: ബൈക്ക് അപകടത്തില്‍പ്പെട്ട് രണ്ട് യുവാക്കള്‍ക്ക് ദാരുണാന്ത്യം.   ചാന്നിക്കാട് തെക്കേപറമ്പില്‍ മുന്‍ പഞ്ചായത്ത് അംഗം സലിജയുടെയും സുരേഷ് കുമാറിന്റെയു മകന്‍ വേണു എസ് കുമാര്‍ (28), മാണിക്കുന്നം പഴിഞ്ഞാല്‍ വടക്കേതില്‍ രാധാകൃഷ്ണന്റെ മകന്‍ ആദര്‍ശ് (25) എന്നിവരാണ് മരിച്ചത്. അപകടത്തില്‍ ഗുരുതരമായി പരിക്കേറ്റ കാരാപ്പുഴ ഇല്ലത്തു പറമ്പില്‍ വിഘ്‌നേശ്വര്‍ വെന്റിലേറ്ററിലാണ്.

ചൊവ്വാഴ്ച ഉച്ചയോടെ മുളങ്കുഴ-പാക്കില്‍ റോഡില്‍ കാക്കൂരിന് സമീപമാണ് ബുള്ളറ്റും പള്‍സര്‍ ബൈക്കും കൂട്ടിയിടിച്ചത്. ഇടിയുടെ ആഘാതത്തില്‍ മൂന്നുപേരും റോഡില്‍ തലയിടിച്ചു വീണു. സംഭവം കണ്ട് ഓടിക്കൂടിയ നാട്ടുകാര്‍ പക്ഷേ നോക്കിനില്‍ക്കുകയാണ് ചെയ്തത്.

കോവിഡ് ഭീതിയാണ് നാട്ടുകാരെ രക്ഷാപ്രവര്‍ത്തനത്തില്‍ നിന്ന് അകറ്റിയത്. ബൈക്കില്‍ എത്തിയ മറ്റു രണ്ടുപേരാണ് ഇവരെ പിന്നീട് ആശുപത്രിയില്‍ എത്തിച്ചത്. പത്തുമിനിറ്റോളം യുവാക്കള്‍ രക്തം വാര്‍ന്ന് റോഡില്‍ കിടന്നു.