അച്ഛന്‍ മരിച്ചതിനെ തുടര്‍ന്ന് താമസം മുത്തച്ഛനും അമ്മൂമ്മയ്ക്കുമൊപ്പം; മുത്തച്ഛന്‍ സ്ഥിരമായി കൂട്ടുകാരുമൊത്ത് വീട്ടിലിരുന്ന മദ്യപിക്കുന്നത് കൊച്ചുമകള്‍ എതിര്‍ത്തു; തന്നെ ചോദ്യം ചെയ്ത കൊച്ചുമകളെ വെട്ടിപ്പരിക്കേല്‍പ്പിച്ച് 76കാരന്‍; സംഭവം തിരുവല്ലയില്‍‌

തിരുവല്ല: തിരുവല്ലയില്‍ മുത്തച്ഛന്റെ മദ്യപാനം ചോദ്യം ചെയ്ത വിദ്യാര്‍ത്ഥിനിയ്ക്ക് വെട്ടേറ്റു. കൂട്ടുകാരുമൊത്ത് വീട്ടിലിരുന്നുള്ള മദ്യപാനം ചോദ്യംചെയ്ത പ്ലസ്ടു വിദ്യാര്‍ത്ഥിനിയെയാണ് മുത്തച്ഛനായ 76കാരനായ മുത്തച്ഛന്‍ ആക്രമിച്ചത്.

തിരുവല്ലയിലെ നെടുമ്പ്രത്താണ് സംഭവം. കഴിഞ്ഞ വ്യാഴാഴ്ച്ച​ വൈകീട്ടാണ്​ സംഭവം.  പിതാവ് മരിച്ചുപോയ പെൺകുട്ടിയും മാതാവും മുത്തച്​ഛനും അമ്മൂമ്മയുമാണ് വീട്ടിൽ താമസം. കമലാസനൻ വീട്ടിൽ കൂട്ടുകാരുമൊത്ത് മദ്യപിക്കുന്നത് പെൺകുട്ടിയും മാതാവ് അമ്പിളി പലതവണ എതിർത്തിരുന്നു.

സംഭവദിവസം അമ്പിളി പുറത്തുപോയ സമയത്താണ് കമലാസനൻ കൂട്ടുകാരുമൊത്ത് മദ്യപിച്ചത്. മടങ്ങിയെത്തിയ അമ്പിളി വീട്ടിൽ നടന്ന മദ്യപാനത്തെക്കുറിച്ച് കമലാസനനോട് ചോദിച്ചു. ഇതിൽ ക്ഷുഭിതനായി അടുക്കളയിൽനിന്ന്​ വെട്ടുകത്തി എടുത്ത് അമ്പിളിയെ ആക്രമിക്കുകയായിരുന്നു. ഇതിനിടെയാണ് മകൾക്ക് വെട്ടേറ്റത്.

പെൺകുട്ടിയുടെ ഇരു കൈകൾക്കും സാരമായി പരിക്കേറ്റു. തിരുവല്ല താലൂക്ക് ആശുപത്രിയിൽ പ്രവേശിപ്പിച്ച പെൺകുട്ടിയുടെ രണ്ട് കൈകളിലുമായി എട്ട് തുന്നലുകളിട്ടു. ആശുപത്രിയിൽനിന്ന്​ ലഭിച്ച വിവരത്തിന്റെ അടിസ്ഥാനത്തിൽ കമലാസനനെ പ്രതിയാക്കി പൊലീസ് കേസ് രജിസ്​റ്റർ ചെയ്തിട്ടുണ്ട്. സംഭവത്തെ തുടർന്ന് കമലാസനൻ ഒളിവിൽ പോയിരുന്നു.