കുവൈറ്റില് ഇന്ന് രാത്രി മുതല് മഴയ്ക്ക് സാധ്യത. ബുധനാഴ്ച രാവിലെ മുതല് മഴ കനക്കും ! രാജ്യത്ത് ബുധനാഴ്ച പൊതു അവധി പ്രഖ്യാപിച്ചു. കുട്ടികളെയുമായി പുറത്തിറങ്ങരുതെന്ന് നിര്ദേശം
കുവൈറ്റ് : കുവൈറ്റില് വ്യാപകമായി കനത്ത മഴയ്ക്ക് സാധ്യത. മണിക്കൂറുകള് നീണ്ടു നില്ക്കുന്ന മഴയെതുടര്ന്നുള്ള വെള്ളപ്പൊക്കം കണക്കിലെടുത്ത് ബുധനാഴ്ച എല്ലാ വിദ്യാഭ്യാസ സ്ഥാപനങ്ങള്ക്കും സര്ക്കാര് ഓഫീസുകള്ക്കും സര്ക്കാര് പൊതു അവധി പ്രഖ്യാപിച്ചു. കുട്ടികളുമായി പുറത്ത് പോകരുതെന്ന് ജനങ്ങള്ക്ക് കര്ശന നിര്ദേശമുണ്ട്.
ചൊവ്വാഴ്ച രാത്രി 12 മണിക്ക് ചാറ്റല് മഴയോടെ ആരംഭിക്കുന്ന മഴ രാവിലെ ഏഴു മണിയോടെ ശക്തി പ്രാപിക്കും എന്നാണ് മുന്നറിയിപ്പ്. ഇത് വൈകിട്ട് 5 മണിവരെ തുടരും.തുടര്ന്ന് ആറു മണിവരെ ഇടിയോടുകൂടിയ ചാറ്റല് മഴയാകുമെങ്കിലും വീണ്ടും ഏഴു മണിയോടെ മഴ കനക്കും എന്നാണ് മുന്നറിയിപ്പ്.
ആവശ്യത്തിനുള്ള ഭക്ഷണ പദാര്ത്ഥങ്ങള് മെഴുകുതിരി എന്നിവയൊക്കെ കരുതി വയ്ക്കാന് നിര്ദേശം ഉണ്ട്. 72 മണിക്കൂര് അടിയന്തിര സേവനത്തിനു തയ്യാറാകാന് ആരോഗ്യ വകുപ്പ് ഉധ്യോഗസ്ഥര്ക്കും നഴ്സുമാര്ക്കും അധികൃതര് നിര്ദേശം നല്കി. അധിക യൂണിഫോം ഉള്പ്പെടെ ആശുപത്രിയില് ഹാജരാകാന് ആണ് നിര്ദേശം . ഹോസ്റ്റലില് താമസിക്കുന്നവര് അടിയന്തിര സാഹചര്യം ഉണ്ടായാല് ഏത് ആശുപത്രിയിലും പോയി ജോലി ചെയ്യാന് തയ്യാറാകണമെന്നാണ് നിര്ദേശം. യാതൊരു വിധ അവധികളും അനുവദനീയമല്ല.