അത്താണിക്കൽ ശ്രീനാരായണ ഗുരുവരാശ്രമം പ്രതിഷ്ഠാ വാർഷികം മെയ് 13, 14, 15 തീയതികളിൽ

കോഴിക്കോട്: ശ്രീനാരായണ ഗുരുദേവന്റെ പാദസ്പർശം കൊണ്ട് ധന്യമായതും ഗുരുദേവ ശിഷ്യൻ ദിവ്യശ്രീ ചൈതന്യ സ്വാമികൾ 1918 ൽ സ്ഥാപിച്ചതുമായ അത്താണിക്കൽ ശ്രീനാരായണ ഗുരുവരാശ്രമത്തിൻ്റെ നവീകരണത്തിനു ശേഷം നടക്കുന്ന പ്രഥമ പ്രതിഷ്ഠാ വാർഷികം മെയ് 13, 14, 15 തിയ്യതികളിൽ നടക്കുമെന്ന് യൂണിയൻ സെക്രട്ടറി സുധീഷ് കേശവപുരി പ്രസിഡൻ്റ് ഷനൂപ് താമരക്കുളം എന്നിവർ അറിയിച്ചു. ശിവഗിരി തീർത്ഥാടനം പോലെ ഗുരുവരാശ്രമ തീർത്ഥാടനമായി പ്രതിഷ്ഠാദിനാഘോഷം എല്ലാ വർഷവും ഇംഗ്ലീഷ് മാസതിയ്യതിയിൽ നടത്തുവാനാണ് തീരുമാനിച്ചിട്ടുള്ളത്. 

പ്രഥമ ഗുരുവരാശ്രമ തീർത്ഥാടന - പ്രതിഷ്ഠാ മഹോത്സവം മെയ്13, 14, 15 തിയ്യതികളിൽ  വിപുലമായ പരിപാടികളോടെയാണ് നടത്തുന്നത്. പരിപാടികൾക്ക് മുന്നോടിയായി മെയ് 5ന് കൊടിയേറ്റം ഗുരുവരശ്രമം മേൽശാന്തി പ്രസൂൺ ശാന്തികളുടെ കാർമികത്വത്തിൽ നടക്കുകയുണ്ടായി.

മെയ് 13ന് വൈകുന്നേരം 5 മണിക്ക് വരക്കൽ കടപ്പുറത്തു നിന്നും താലപ്പൊലിയുടെയും വാദ്യമേളങ്ങളുടെയും അകമ്പടിയോടെയുള്ള തീർത്ഥാടന ഘോഷയാത്ര ആരംഭിക്കും. 6.30 മണിക്ക്  ഗുരുവരശ്രമത്തിൽ സജ്ജമാക്കിയ രാരിച്ചൻ മൂപ്പൻ നഗറിൽ വെച്ച് ഉദ്ഘാടന സമ്മേളനം നടക്കും ഉദ്‌ഘാടനം ആലുവ അദ്വൈതാശ്രമം മഠാധിപതി സ്വാമി ധർമ്മ ചൈതന്യ നിർവഹിക്കും.

മാതൃഭൂമി ചെയർമാനും മാനേജിങ് എഡിറ്ററുമായ പി വി ചന്ദ്രൻ തീർത്ഥാടന സന്ദേശം നൽകും എസ്എന്‍ഡിപി യോഗം അസിസ്റ്റന്റ് സെക്രട്ടറി അഡ്വ.രാജൻ മഞ്ചേരി മുഖ്യ പ്രഭാഷണം നടത്തും. ശിവഗിരി മഠം വൈദികകാചാര്യൻ സ്വാമി ശിവനാരായണതീർത്ഥ, ചേർത്തല വിശ്വഗാജി മഠം സെക്രട്ടറി സ്വാമി പ്രബോധതീർത്ഥ എന്നിവർ പ്രഭാഷണം നടത്തും. 

മെയ് 14ന്  പ്രതിഷ്ഠ ദിനത്തോടനുബന്ധിച്ച്  പുലർച്ചെ മുതൽ വിശേഷാൽ ഗുരുപൂജ, മഹാ ശാന്തി ഹവനം, കലശ പൂജ കലശാഭിഷേകം, അന്നദാനം, മഹാ സർവൈശ്വര്യ പൂജ എന്നിവ നടക്കും. മെയ് 13, 14 തിയ്യതികളിൽ രാത്രി വിവിധ കലാപരിപാടികളും അരങ്ങേറും.

മെയ് 15ന്  തീർത്ഥാടന സമാപനവും എസ്എൻഡിപി യോഗം സ്ഥാപന ദിനാഘോഷവും നടക്കും. റിട്ട. ആർഡിഒയും ശ്രീനാരായണ പഠന കേന്ദ്രം ഡയറക്ടറുമായ വിജയലാൽ നെടുങ്കണ്ടം ഉദ്ഘാടനം നിർവ്വഹിക്കും. ചാലക്കുടി ഗായത്രി ആശ്രമത്തിലെ ഗുരുദർശന രഘന മുഖ്യ പ്രഭാഷണം നടത്തും. ബാബുരാജ് ശർമ്മ, എ പി മുരളീധരൻ മാസ്റ്റർ, ബാബു പൂതമ്പാറ എന്നിവർ പ്രസംഗിക്കും.