ആരാധകര് കാത്തിരിക്കുന്ന മമ്മൂട്ടി ചിത്രം പരോളിന്റെ ട്രെയിലർ പുറത്തിറങ്ങി. ഫേസ്ബുക്കിലൂടെ മമ്മൂട്ടിയാണ് പരോളിന്റെ ട്രെയിലര് പുറത്തുവിട്ടത്. നവാഗതനായ ശരത് സന്ദിത് ആണ് ചിത്രം സംവിധാനം ചെയ്യുന്നത്. ജയിൽ പശ്ചാത്തലമാക്കിയുള്ള ചിത്രത്തിൽ സഖാവായാണ് മമ്മൂട്ടിയെത്തുന്നത്.
Advertisment
അജിത്ത് പൂജപ്പുരയാണ് ചിത്രത്തിന് തിരക്കഥയൊരുക്കിയത്. നീണ്ട ഇടവേളയ്ക്ക് ശേഷമാണ് മമ്മൂട്ടി കുടുംബനാഥന്റെ വേഷത്തിലെത്തുന്നത്. ട്രെയിലര് കൂടി കാണുന്നതോടെ ഇത് കുടുംബചിത്രമാണെന്ന കാര്യത്തിന് ഒന്നുകൂടി വ്യക്തത കൈവന്നിരിക്കുകയാണ്.
സിദ്ധിഖ്, മിയ ജോർജ്, ഇനിയ, മുത്തുമണി, ലാലു അലക്സ്, സുരാജ് വെഞ്ഞാറമൂട്, സുധീർ കരമന, കലാഭവൻ ഹനീഫ്, അലെൻസിയർ തുടങ്ങി വൻതാരനിരയുമായാണ് പരോൾ എത്തുന്നത്. സഖാവ് അലകസ് എന്ന കഥാപാത്രമായാണ് മമ്മൂട്ടി ചിത്രത്തില് പ്രത്യക്ഷപ്പെടുന്നത്. മാര്ച്ച് 31 ന് ചിത്രം തിയേറ്ററുകളിലേക്കെത്തുമെന്നുള്ള റിപ്പോര്ട്ടുകളാണ് ഇതുവരെ ലഭിച്ചിട്ടുള്ളത്.
എസ് ലോകനാഥൻ ഛായാഗ്രഹണം നിർവഹിക്കുന്നു. ഷരത്, എൽവിൻ ജോഷ്വ എന്നിവരുടേതാണ് സംഗീതം. ചിത്രം നിർമിക്കുന്നത് ആൻറണി ഡിക്രൂസാണ്.