ന്യൂഡൽഹി : 2019 ന് മുമ്പുള്ള സെമി ഫൈനൽ മത്സരത്തില് ബിജെപിയുടെ പൊടിപോലും ഇല്ലെന്ന് പശ്ചിമ ബംഗാൾ മുഖ്യമന്ത്രി മമത ബാനർജി. അഞ്ച് സംസ്ഥാനങ്ങളിലേക്കു നടന്ന നിയമസഭാ തെരഞ്ഞെടുപ്പുകൾ 2019 ന് മുമ്പുള്ള സെമി ഫൈനൽ മത്സരമായിരുന്നു. ഫൈനലിനു മുമ്പു നടന്ന സെമിയിൽ ബിജെപി ഒരിടത്തുമില്ല.
ജനാധിപത്യത്തിൽ ജനങ്ങളാണ് എല്ലായ്പ്പോഴും മാൻ ഓഫ് ദി മാച്ചെന്നും അവർ കൂട്ടിച്ചേർത്തു. നിയമസഭാ തെരഞ്ഞെടുപ്പിൽ ബിജെപിക്കു നേരിട്ട കനത്ത പരാജയവുമായി ബന്ധപ്പെട്ട് പ്രതികരിക്കുകയായിരുന്നു അവർ.
ജനങ്ങൾ ബിജെപിക്ക് എതിരായി വോട്ട് ചെയ്തു. ഇത് ജനങ്ങളുടെ വിധിയാണ്. രാജ്യത്തെ ജനങ്ങളുടെ വിജയമാണ്. ജനാധിപത്യത്തിന്റെ വിജയമാണിത്. അനീതിക്കെതിരായ, അതിക്രമങ്ങൾക്കെതിരായ വിജയമാണിത്.
ഭരണഘടനാ സ്ഥാപനങ്ങളെ ഇല്ലാതാക്കുന്നതിനും അന്വേഷണ ഏജൻസികളെ ദുരുപയോഗം ചെയ്യുന്നതിനും പാവപ്പെട്ടവർക്കായി ഒന്നും ചെയ്യാതിരിക്കുന്നതിനും എതിരായ വിജയമാണിത്.
കൃഷിക്കാർ, യുവാക്കൾ, ദളിതുകൾ, പട്ടികജാതി പട്ടകവർഗ വിഭാഗം, ന്യൂനപക്ഷങ്ങൾ എന്നിവരുടെ കൂടി വിജയമാണിതെന്നും മമത പറഞ്ഞു. വിജയികളെ അവർ അഭിനന്ദിക്കുകയും ചെയ്തു.