കോല്ക്കത്ത: ലോക്സഭാ തെരഞ്ഞെടുപ്പിലെ തിരിച്ചടിയെ തുടര്ന്ന് മുഖ്യമന്ത്രിസ്ഥാനം രാജിവയ്ക്കാനൊരുങ്ങി പശ്ചിമ ബംഗാള് മുഖ്യമന്ത്രി മമത ബാനര്ജി. പാര്ട്ടി ആവശ്യപ്പെട്ടാല് രാജിക്കൊരുക്കമാണെന്ന് മമത പറഞ്ഞു.
തെരഞ്ഞെടുപ്പ് ഫലം പുറത്തുവന്നതിനു ശേഷം ആദ്യമായി നടത്തിയ വാര്ത്താ സമ്മേളനത്തിലാണ് മമത രാജിസന്നദ്ധത പരസ്യമാക്കിയത്. പാര്ട്ടിയുടെ ആഭ്യന്തരസമിതിയില് താന് രാജിസന്നദ്ധത അറിയിച്ചു. എന്നാല് പാര്ട്ടി ഇത് തള്ളി. അതിനാല് തുടരുന്നു- മമത പറഞ്ഞു.
കഴിഞ്ഞ അഞ്ച് മാസങ്ങളായി ശരിയായി പ്രവര്ത്തിക്കാന് കഴിഞ്ഞില്ല. സുദീര്ഘമായ തെരഞ്ഞെടുപ്പിനെ തുടര്ന്നാണ് ശരിയായി ജോലിചെയ്യാന് കഴിയാതെ വന്നത്. താനൊരു ദുര്ബലയായ മുഖ്യമന്ത്രിയായിരുന്നു. ഇത് തനിക്ക് അംഗീകരിക്കാനാവില്ല. മുഖ്യമന്ത്രിയായി തുടരാന് തനിക്ക് ആഗ്രഹമില്ല. ഈ കസേര തനിക്ക് ഒന്നുമല്ല. പാര്ട്ടി ചിഹ്നമാണ് തനിക്ക് വലുതെന്നും അവര് പറഞ്ഞു. ജനങ്ങള് ശക്തമായ നിലപാട് സ്വീകരിക്കാന് തയാറായാല് മാത്രമേ താന് തുടരൂ- മമത പറഞ്ഞു.