തൃശൂര്: സംവിധായകന് ശ്രീകുമാര് മേനോന് ഭീഷണിപ്പെടുത്തുന്നുവെന്ന നടി മഞ്ജു വാര്യരുടെ പരാതിയില് കൂടുതല് പേരുടെ മൊഴിയെടുക്കുന്നു. 'ഒടിയന്' സിനിമയുടെ സെറ്റിലുണ്ടായിരുന്ന എല്ലാവരെയും മൊഴിയെടുക്കും. സെറ്റില് കേക്ക് മുറിച്ചപ്പോഴുണ്ടായിരുന്ന എല്ലാവരെയും വിളിച്ചുവരുത്തി മൊഴിയെടുക്കാനാണ് ക്രൈംബ്രാഞ്ച് നീക്കം.
വിവാഹശേഷം അഭിനയരംഗം വിട്ട മഞ്ജുവാര്യര്ക്ക് കല്ല്യാണ് ജ്വല്ലേഴ്സിന്റെ പരസ്യത്തിലൂടെ തിരിച്ചു വരവിന് അവസരമൊരുക്കിയത് ശ്രീകുമാര് മേനോനായിരുന്നു. മോഹന്ലാലിനെ നായകനാക്കി ശ്രീകുമാര് മേനോന് ആദ്യമായി സംവിധാനം ചെയ്ത ബിഗ് ബജറ്റ് ചിത്രം ഒടിയനില് നായികാ വേഷത്തിലെത്തിയതും മഞ്ജുവാണ്.
സിനിമയുടെ സെറ്റില് കേക്ക് മുറിക്കുന്നതിനിടെ സംവിധായകന് മോശമായി പെരുമാറിയെന്നാണ് മഞ്ജുവിന്റെ പരാതിയില് പറയുന്നത്. നേരത്തെ, നിര്മാതാവ് ആന്റിണി പെരുമ്പാവൂര്, പ്രൊഡക്ഷന് കണ്ട്രോളര് സജി സി. ജോസഫ്, മഞ്ജു വാരിയരുടെ ഓഡിറ്റര്, മഞ്ജു ഫാന്സ് അസോസിയേഷന് സെക്രട്ടറി രേഖ തുടങ്ങിയവരുടെ മൊഴി കൈബ്രാഞ്ച് രേഖപ്പെടുത്തിയിരുന്നു.