ന്യൂഡൽഹി: പ്രധാനമന്ത്രി നരേന്ദ്ര മോദിക്കെതിരായ വിമർശനങ്ങൾക്കു പിന്നാലെ മുൻ പ്രധാനമന്ത്രി മൻമോഹൻ സിംഗിനെ പുകഴ്ത്തി ഡൽഹി മുഖ്യമന്ത്രി അരവിന്ദ് കേജരിവാൾ. മൻമോഹൻ സിംഗിനെപ്പോലെ വിദ്യാഭ്യാസമുള്ള ഒരു പ്രധാനമന്ത്രിയെ ജനങ്ങൾ "മിസ്’ ചെയ്യുന്നു എന്നായിരുന്നു കേജരിവാളിന്റെ പരാമർശം.
പ്രധാനമന്ത്രി തീർച്ചയായും വിദ്യാഭ്യാസമുള്ളവനായിരിക്കണം. മൻമോഹൻ സിംഗിനെപ്പോലെ വിദ്യാഭ്യാസവും വിവരവുമുള്ള ഒരു പ്രധാനമന്ത്രിയെ ജനങ്ങൾക്കു ലഭിച്ചില്ല. പ്രധാനമന്ത്രി വിവരമുള്ളവനായിരിക്കണമെന്ന് ഇപ്പോൾ ജനങ്ങൾക്കും ബോധ്യപ്പെട്ടു തുടങ്ങി- കേജരിവാൾ ട്വീറ്റ് ചെയ്തു. രൂപയുടെ മൂല്യം ഇടിയുന്നതു സംബന്ധിച്ച വാൾസ്ട്രീറ്റ് ജേർണലിന്റെ റിപ്പോർട്ട് ഉദ്ധരിച്ചായിരുന്നു കേജരിവാളിന്റെ ട്വീറ്റ്.
മോദി സർക്കാർ രാജ്യതലസ്ഥാനത്തെ പ്രശ്നങ്ങളെ അവഗണിക്കുകയും എഎപി നേതാക്കൾക്കു നേരെ സിബിഐയെ ഉപയോഗിച്ചു റെയ്ഡുകൾ നടത്തി വൈരം തീർക്കുകയാണെന്നും കേജരിവാൾ ട്വീറ്റിൽ കുറ്റപ്പെടുത്തി. പ്രധാനമന്ത്രി നരേന്ദ്ര മോദിയുടെ വിദ്യാഭ്യാസം സംബന്ധിച്ചു തുടർച്ചയായി സംശയങ്ങൾ ഉന്നയിക്കുന്നവരാണ് കേജരിവാളും ആദം ആദ്മി പാർട്ടിയും.