വിസ്കോണ്സിന്: അമ്മയുടെ ചിതാഭസ്മം കഞ്ചാവില് കൂട്ടിക്കലര്ത്തി വിറ്റ യുവാവിനേയും കാമുകിയേയും പോലീസ് അറസ്റ്റു ചെയ്തു. വിസ്കോണ്സിനിലാണ് സംഭവം. മെനോമോണി ഫാള്സിലെ അപ്പാര്ട്ട്മെന്റില് മയക്കുമരുന്ന് വില്പന നടക്കുന്നുണ്ടെന്ന വിവരം ലഭിച്ചതനുസരിച്ചാണ് രഹസ്യാന്വേഷണ പോലീസ് വേഷം മാറി ഉപഭോക്താവായി എത്തിയത്. വിലയുറപ്പിച്ചതിനുശേഷം കുറച്ച് കഞ്ചാവ് വാങ്ങി. കുറച്ച് ദിവസങ്ങള്ക്ക് ശേഷം ഉദ്യോഗസ്ഥന് വീണ്ടും തിരിച്ചെത്തി, കഞ്ചാവ് വാങ്ങി.
എന്നാല്, തുടര്ന്നു അപ്പാര്ട്ട്മെന്റില് നടത്തിയ തിരച്ചിലില് കഞ്ചാവും 70 ഗ്രാം മരുന്ന്, എംഡിഎംഎ, ബോംഗ്സ്, മയക്കുമരുന്ന് തൂക്കാനുള്ള തുലാസ് തുടങ്ങിയവ കണ്ടെത്തി. തുടര്ന്നാണ് ഓസ്റ്റിന് ഷ്രോഡറും (26) കാമുകി കെറ്റ്ലിന് ഗെയ്ഗറും (21) അറസ്റ്റിലായത്.
അജ്ഞാതമായ ഏതോ പൗഡര് അപ്പാര്ട്ട്മെന്റില് കണ്ടെത്തിയതില് സംശയം തോന്നിയ പോലീസിന്റെ ചോദ്യം ചെയ്യലിലാണ് അത് തന്റെ അമ്മയുടെ ചിതാഭസ്മമാണെന്ന് ഷ്രോഡര് പറഞ്ഞത്. കഞ്ചാവില് കൂട്ടിക്കലര്ത്തി വില്ക്കാനാണത്രേ അത് സൂക്ഷിച്ചിരിക്കുന്നത്.
മയക്കുമരുന്നു വില്ക്കാനുള്ള ഉദ്ദേശ്യത്തോടെ കൈവശം വയ്ക്കുക, മയക്കുമരുന്ന് സാമഗ്രികള് കൈവശം വയ്ക്കുക, മയക്കുമരുന്ന് കടത്ത് തുടങ്ങിയ കുറ്റങ്ങളാണ് ഇയാള്ക്കെതിരെ ചുമത്തിയിരിക്കുന്നതെന്ന് കോടതി രേഖകള് വ്യക്തമാക്കുന്നു.
വിസ്കോണ്സിനില് കഞ്ചാവ് ഇപ്പോഴും നിയമവിരുദ്ധമാണ്. എന്നിരുന്നാലും 2019 സെപ്റ്റംബറില് വിസ്കോണ്സിന് നിയമനിര്മാതാക്കള് മരുന്നുകള്ക്കായി കഞ്ചാവ് നിയമവിധേയമാക്കുന്നതിനുള്ള ബില് അവതരിപ്പിച്ചിട്ടുണ്ട്.