മന്ത്രി അക്ബര്‍ക്കായുള്ള ബിജെപിയുടെ രക്ഷാ തന്ത്രങ്ങള്‍ പൊളിയുന്നു : ഹോട്ടലിലേയ്ക്ക് വിളിച്ച് വരുത്തി ഉള്‍വസ്ത്രം മാത്രം ധരിച്ചെത്തി, കടന്നുപിടിച്ചു ചുംബിച്ചു

ന്യൂഡൽഹി∙ ‘മീ ടൂ’ വില്‍ നിന്നും രക്ഷിച്ചെടുക്കാന്‍ ബിജെപി ഒരുക്കുന്ന രക്ഷാകവചങ്ങള്‍ ഒന്നും കേന്ദ്രവിദേശകാര്യ സഹമന്ത്രി എം.ജെ.അക്ബറിന് മതിയാകാതെ വരുമെന്ന് സൂചന. മന്ത്രിക്കെതിരെ കൂടുതല്‍ കടുത്ത ആരോപണവുമായി രംഗത്ത് വന്നിരിക്കുകയാണ് മറ്റൊരു മാധ്യമപ്രവര്‍ത്തക കൂടി . ‘ഡെക്കാൻ ക്രോണിക്കിൾ’ ദിനപത്രത്തിൽ ജോലി ചെയ്യുമ്പോൾ അക്ബർ മോശമായി പെരുമാറിയെന്നു വനിതാ മാധ്യമപ്രവർത്തക തുഷിത പട്ടേൽ ആരോപിച്ചു. ഓൺലൈൻ മാധ്യമത്തിനു നൽകിയ തുറന്ന കത്തിലൂടെയാണു 1992ൽ നടന്ന സംഭവങ്ങൾ തുഷിത വെളിപ്പെടുത്തിയത്.

ടെലഗ്രാഫിനു വേണ്ടി കൊൽക്കത്തയിൽ ജോലി ചെയ്യവേ നഗരത്തിലെത്തിയ അക്ബർ നിരന്തരം തന്നെ വിളിക്കുമായിരുന്നു. നേരിട്ടു കാണണമെന്ന് ആവശ്യപ്പെട്ടായിരുന്നു വിളികളത്രയും. അന്നു തനിക്ക് 22 വയസ്സു മാത്രമായിരുന്നു പ്രായം. നിരന്തരം വിളികളെത്തിയതോടെ തുടക്കക്കാരിയായ തനിക്ക് അതു തള്ളിക്കളയാനും സാധിക്കുമായിരുന്നില്ല. ഹോട്ടലിലെത്തിയ തന്നെ ഉൾവസ്ത്രം മാത്രം ധരിച്ചാണ് അദ്ദേഹം സ്വീകരിച്ചതെന്നും കത്തിൽ തുഷിത പറയുന്നു.

പിന്നീട് ഒരു വർഷത്തിനുശേഷമാണു താൻ ഡെക്കാൻ ക്രോണിക്കിളിൽ ചേരുന്നത്. ആ അവസരത്തിൽ അക്ബറായിരുന്നു എഡിറ്റർ–ഇന്‍–ചീഫ്. അന്നും ചർച്ചയ്ക്കെന്നു പറഞ്ഞ് അക്ബർ തന്നെ ഹോട്ടലിലേക്കു വിളിപ്പിച്ചിരുന്നു. മുറിയുടെ ഉള്ളിലേക്കു കടന്നയുടൻ തന്നെ കയറിപ്പിടിക്കുകയും ചുംബിക്കുകയും ചെയ്തു.

പരാജിതയായി, അപമാനിക്കപ്പെട്ട്, മുറിവേറ്റവളെപ്പോലെ കരയുന്ന അവസ്ഥയിലായിരുന്നു താൻ. കരച്ചിൽ അവസാനിക്കുന്നതുവരെ ആ മുറിയിൽ തന്നെ തുടർന്നു. അക്ബർ അവിടെനിന്നു പോകുന്നവരെ അവിടെ നിന്നു, പിന്നീടു ശുചിമുറിയിൽ പോയി മുഖം വളരെ അമർത്തിക്കഴുകി. തുടർന്നു ജോലിക്കു പ്രവേശിക്കുകയും ചെയ്തു – തുഷിത കത്തിലെഴുതി.

ബിജെപിയെ വെട്ടിലാക്കിയാണു അക്ബറിനെതിരായ ‘മീ ടൂ’ ആരോപണങ്ങൾ തുടരുന്നത്. വിവാദങ്ങൾ തുടര്‍ന്നതോടെ രാജിയുണ്ടാകുമെന്നു കരുതിയിരുന്നെങ്കിലും താൻ രാജി വയ്ക്കില്ലെന്ന് അക്ബർ വ്യക്തമാക്കിയിരുന്നു. കൂടാതെ തനിക്കെതിരെ ആരോപണങ്ങൾ ഉന്നയിച്ചവർക്കെതിരെ നിയമനടപടികൾ സ്വീകരിക്കാനും അദ്ദേഹം തീരുമാനിച്ചിട്ടുണ്ട്. ആദ്യ ആരോപണം ഉന്നയിച്ച മാധ്യമ പ്രവര്‍ത്തകക്കെതിരെ അദ്ദേഹം കേസ് നല്‍കുകയും ചെയ്തിട്ടുണ്ട്.