ഫത്തേപുര: ബിജെപി സ്ഥാനാർഥിക്ക് വോട്ട് ചെയ്തില്ലെങ്കിൽ പ്രധാനമന്ത്രി നരേന്ദ്ര മോദി പിടിവീഴുമെന്ന് ഭീഷണി. ഗുജറാത്തിലെ ദഹോദയിലെ വോട്ടർമാരെയാണ് ബിജെപി നേതാവ് ഭീഷണിപ്പെടുത്തിയത്. ഫത്തേപുരയിലെ ബിജെപി എംഎൽഎ രമേഷ് കത്താരയാണ് വോട്ട് ചെയ്യാത്തവരെ മോദി കണ്ടെത്തുമെന്നും പിന്നീട് ജോലിയുണ്ടാവില്ലെന്നും ഭീഷണിപ്പെടുത്തി രംഗത്തെത്തിയത്.
വോട്ടിംഗ് യന്ത്രത്തിൽ ജസ്വന്ത് സിംഗ് ഭാഭോറിന്റെ (ദാഹോദിലെ ബിജെപി സ്ഥാനാർഥി) ചിത്രമോ താമര ചിഹ്നമോ കണ്ടാൽ ആ ബട്ടണിൽ വിരൽ അമർത്തണം. ഒരിക്കലും പിശക് ഉണ്ടാകരുത്- കത്താര പറഞ്ഞു. മോദി കാമറകൾ സ്ഥാപിച്ചിട്ടുണ്ട്. ആരാണ് ബിജെപിക്ക് വോട്ട് ചെയ്യുന്നത്, ആരാണ് കോൺഗ്രസിന് വോട്ട് ചെയ്യുന്നത് ഇതെല്ലാം കാണുന്നുണ്ട്.
ആധാറിൽ ഉൾപ്പെടെ എല്ലാ കാർഡുകളിലും നിങ്ങളുടെ ചിത്രം പതിപ്പിച്ചിട്ടുണ്ട്. നിങ്ങളുടെ ബൂത്തിൽ പോളിംഗ് കുറവാണെങ്കിൽ ആരാണ് വോട്ട് ചെയ്യാത്തതെന്ന് അദ്ദേഹം അറിയും. പിന്നീട് നിങ്ങളുടെ തൊഴിൽ ഉണ്ടാവില്ലെന്നും രമേഷ് കത്താര ഭീഷണിപ്പെടുത്തി.