ന്യൂഡല്ഹി: രണ്ടാമൂഴം എന്ന നോവല് സിനിമയാക്കുന്നത് സംബന്ധിച്ച് എം ടി വാസുദേവന് നായരും സംവിധായകന് വി എസ് ശ്രീകുമാറും തമ്മിലുളള തര്ക്കത്തില് ഒത്തുതീര്പ്പായി. കഴിഞ്ഞയാഴ്ചയാണ് തര്ക്കം കോടതിക്ക് പുറത്തുവച്ച് ഒത്തുതീര്പ്പാക്കാന് രണ്ടുകൂട്ടരും ധാരണയായത്. തുടര്ന്നാണ് ഒത്തുതീര്പ്പുവ്യവസ്ഥകള് കേസ് പരിഗണിക്കുന്ന സുപ്രീംകോടതിയെ അറിയിച്ചത്.
രണ്ടാമൂഴത്തിന്റെ തിരക്കഥ എം ടിക്ക് തിരിച്ചു നല്കും. തിരക്കഥയില് പൂര്ണ അവകാശം എം ടിക്കായിരിക്കും. അഡ്വാന്സ് ആയി വി എസ് ശ്രീകുമാറില് നിന്ന് എം ടി വാങ്ങിയ ഒന്നേകാല് കോടി തിരിച്ചുനല്കും.
രണ്ടാമൂഴത്തിന്റെ പ്രമേയം അടിസ്ഥാനമാക്കി വി എസ് ശ്രീകുമാര് സിനിമ ചെയ്യാന് പാടില്ല. എന്നാല് മഹാഭാരതം പ്രമേയമാക്കി സിനിമയെടുക്കാം. പക്ഷേ, ഭീമനെ കേന്ദ്ര കഥാപാത്രമാക്കരുത് എന്നിവയായിരുന്നു ഒത്തുതീര്പ്പുവ്യവസ്ഥയിലെ പ്രധാന വ്യവസ്ഥകള്.
മോഹന്ലാലിനെ നായകനാക്കി സിനിമ ചെയ്യാനായിരുന്നു പദ്ധതിയിട്ടിരുന്നത് എന്നാല് കരാര് പ്രകാരമുളള കാലാവധി കഴിഞ്ഞിട്ടും സിനിമയുടെചിത്രീകരണം തുടങ്ങാത്ത പശ്ചാത്തലത്തിലാണ് എംടി കോടതിയെ സമീപിച്ചത്.