മുത്തൂറ്റ് ഫിനാൻസിന്‍റെ ശാഖയില്‍ മോഷണം; 70 കിലോയോളം സ്വർണം മോഷണം പോയതായി പരാതി.. ലോക്കറുകൾ ഗ്യാസ് കട്ടറുകൾ ഉപയോഗിച്ച് തകർത്തായിരുന്നു മോഷണം ...സ്ഥാപനത്തിലെ സുരക്ഷാ ക്രമീകരണങ്ങൾ അറിയുന്നവരാണ് മോഷണം നടത്തിയതെന്ന് പോലീസ്

ബംഗളൂരു: മുത്തൂറ്റ് ഫിനാൻസിന്‍റെ ബംഗളൂരു ലിംഗരാജപുരം ശാഖയിൽ നിന്ന് 70 കിലോയോളം സ്വർണം മോഷണം പോയതായി പരാതി. കേസെടുത്ത പുലികേശി നഗർ പൊലീസ്കെട്ടിടത്തിലെ സുരക്ഷാ ജീവനക്കാരനടക്കം മൂന്ന് പേരെ കസ്റ്റഡിയിൽ എടുത്തു. ഞായറാഴ്ച രാത്രിയാണ് മോഷണം നടന്നത്.

മോഷ്ടാക്കൾ കുളിമുറിയുടെ ഭിത്തി തുരന്നാണ് അകത്തുകടന്നതെന്നു സംശയിക്കുന്നതായി പൊലീസ് പറയുന്നു. ലോക്കറുകൾ ഗ്യാസ് കട്ടറുകൾ ഉപയോഗിച്ച് തകർത്ത നിലയിലാണ്.

സ്ഥാപനത്തിലെ സുരക്ഷാ ക്രമീകരണങ്ങൾ നന്നായി അറിയുന്നവരാണ് മോഷണത്തിന് പിന്നിലെന്നാണ് പൊലീസ് നിഗമനം. തിങ്കളാഴ്ച രാവിലെജോലിക്കെത്തിയ ജീവനക്കാരാണ് മോഷണം നടന്ന വിവരം അറിഞ്ഞത്.

കഴിഞ്ഞ ദിവസം, ബീഹാറിലെ ഹാജിപൂരിലെ മുത്തൂറ്റ് ഫിനാൻസ് കോ ബ്രാഞ്ചിലും കവര്‍ച്ച നടന്നിരുന്നു. മുത്തൂറ്റ് ശാഖ മാനേജരെ തോക്ക് ചൂണ്ടി ഭീഷണിപ്പെടുത്തി ബാങ്കിൽ നിന്നും 55 കിലോ സ്വര്‍ണമാണ് അക്രമികൾ കവര്‍ന്നത്.