ന്യൂഡല്ഹി: സിബിഐ ഡയറക്ടറെ കണ്ടത്തൊനുള്ള ചുരുക്കപ്പട്ടികയില് കേരള ഡിജിപി ലോക്നാഥ് ബെഹ്റയുടെ പേരില്ലെന്നു റിപ്പോര്ട്ട്. പുതിയ സിബിഐ ഡയറക്ടര്മാരെ കണ്ടെത്തുന്നതിനായി കേന്ദ്ര പേഴ്സണല് മന്ത്രാലയം തയാറാക്കിയ പത്തു പേരുടെ ചുരുക്കപ്പട്ടികയില് ബെഹ്റയുടെ പേരില്ലെന്നാണു വിവരം.
സീനിയോറിറ്റിയും അഴിമതി കേസുകള് അന്വേഷിച്ചുള്ള പ്രാഗത്ഭ്യം, സിബിഐ മുന്പരിചയം, വിജിലന്സ് കേസുകകളിലെ പരിചയം എന്നിവയാണ് മാനദണ്ഡങ്ങള്. പ്രധാനമന്ത്രി നരേന്ദ്ര മോദി, സുപ്രീംകോടതി ജഡ്ജി എ.കെ സിക്രി, കോണ്ഗ്രസ് നേതാവ് മല്ലികാര്ജുന ഖാര്ഗെ എന്നിവര് ഉള്പ്പെട്ട ഉന്നതാധികാര സമിതിയാണ് പുതിയ സിബിഐ മേധാവിയെ തെരഞ്ഞെടുക്കുന്നത്.
ഡയറക്ടര് ജനറല് റാങ്കിലുള്ള സീനിയര് ഐപിഎസ് ഉദ്യോഗസ്ഥരുടെ പേരുകളാണ് പട്ടികയില് ഉള്ളത്. മുംബയ് പോലീസ് കമ്മീഷണര് സുബോദ് കുമാര് ജയ്സ്വാള്, യുപി ഡിജിപി ഒ.പി സിംഗ്, എന്ഐഎ മേധാവി വൈ.സി മോദി എന്നിവരാണ് സാധ്യത പട്ടികയില് ഉള്ളത്.
കേന്ദ്ര ആഭ്യന്തരമന്ത്രാലയത്തില് ആഭ്യന്തര സുരക്ഷ വിഭാഗം സ്പെഷ്യല് സെക്രട്ടറി റിന മിത്ര, സിആര്പിഎഫ് ഡയറക്ടര് ജനറല് രാജീവ് റായ് ഭട്ട്നാഗര്, നാഷണല് സെക്യൂരിറ്റ് ഗാര്ജ് ഡയറക്ടര് ജനറല് സുദീപ് ലഖ്താക്കിയ, ബ്യൂറോ ഓഫ് പോലീസ് റിസര്ച്ച് ആന്റ് ഡവലപ്പ്മെന്റ് മേധാവി എ.പി മഹേശ്വരി, നാഷണല് ഇന്സ്റ്റിറ്റ്യൂട്ട് ഓഫ് ക്രിമിനോളജി ആന്റ് ഫോറന്സിക് സയന്സ് മേധാവി എസ്. ജാവേദ് അഹമ്മദ്, ബിഎസ്എഫ് ഡയറക്ടര് ജനറല് രജനീകാന്ത് മിശ്ര, ഇന്തോ ടിബറ്റന് ബോര്ഡര് പോലീസ് മേധാവി എസ്.എസ് ദേസ്വാള് എന്നിവരാണ് പട്ടികയിലുള്ളത്.