നവീകരണത്തിന് 18 ലക്ഷം, പ്ലാന്റ് റൂമിന് ഏഴ് ലക്ഷം! മുഖ്യമന്ത്രിയുടെ ഔദ്യോഗിക വസതിയിലെ നീന്തല്‍ക്കുളത്തിനായി ചെലവഴിച്ചത് 31.92 ലക്ഷം രൂപ; വിവരവകാശ രേഖ പുറത്ത്; കണക്കുകള്‍ ഇങ്ങനെ

തിരുവനന്തപുരം: മുഖ്യമന്ത്രി പിണറായി വിജയന്റെ ഔദ്യോഗിക വസതിയിലെ നീന്തൽകുളത്തിനായി 31,92, 360 രൂപ ചെലവഴിച്ചെന്ന് വിവരവകാശ രേഖ. കെ പി സി സി സെക്രട്ടറി അഡ്വ.സി.ആർ. പ്രാണകുമാറിന് ടൂറിസം ഡയറക്ടറേറ്റിൽ നിന്ന് വിവരവകാശ നിയമ പ്രകാരം ലഭിച്ച മറുപടിയിലാണ് നീന്തൽകുളത്തിനായി ചെലവഴിച്ച ലക്ഷങ്ങളുടെ കണക്കുകൾ പുറത്ത് വന്നത്.

ക്ലിഫ് ഹൗസിൽ നീന്തൽകുളത്തിന്റെ നവീകരണത്തിനായി 18, 06, 789 രൂപയും റൂഫിന്റെ ട്രസ് വർക്കുകൾക്കും പ്ലാന്റ് റൂമിന്റെ നവീകരണത്തിനുമായി 7,92,433 രൂപയും ചെലവായി. കൂടാതെ വാർഷിക മെയിന്റനൻസിനായി 2, 28, 330 രൂപയും 3, 64, 812 രൂപയും ചെലവഴിച്ചു. 2016 മെയ് മുതൽ നീന്തൽകുളത്തിനായി ചെലവാക്കിയ തുകയാണിത്.

നീന്തൽകുളത്തിന് ചെലവഴിച്ച തുകയുടെ വിശദാംശങ്ങൾ ടൂറിസം മന്ത്രി മുഹമ്മദ് റിയാസിനോട് നിയമസഭയിൽ പല തവണ ചോദ്യം ഉന്നയിച്ചെങ്കിലും മറുപടി തരാതെ ഒഴിഞ്ഞുമാറുകയായിരുന്നു റിയാസെന്നും, സാമ്പത്തിക പ്രതിസന്ധി ക്കിടയിലും മുഖ്യമന്ത്രിയുടെ സുരക്ഷക്കും ഔദ്യോഗിക വസതിയിലെ ചെലവുകൾക്കുമായി ലക്ഷങ്ങൾ ആണ് ചെലവഴിക്കുന്നതെന്നും പ്രാണകുമാര്‍ പറഞ്ഞു.

ക്ലിഫ് ഹൗസിലെ കാലി തൊഴുത്തിന് 42.50 ലക്ഷം, ലിഫ്റ്റിന് 25.50 ലക്ഷവും അനുവദിച്ചിരുന്നു. പുതിയ കിയ കാർണിവലിന് പുറമേ മുഖ്യമന്ത്രിക്ക് ഡൽഹിയിലും കണ്ണൂരിലും സഞ്ചരിക്കാൻ കനത്ത സുരക്ഷ സൗകര്യമുള്ള കാർ വാങ്ങിയിരുന്നു. 28 കാറുകളുടെ അകമ്പടിയോടെ യാത്ര ചെയ്യാൻ മാത്രം എന്ത് സുരക്ഷ ഭീഷണിയാണ് കേരളത്തിൽ മുഖ്യമന്ത്രിക്ക് നേരെയുള്ളത് എന്ന ചോദ്യമാണ് ഉയരുന്നത്. ആംബുലൻസും പോലീസ് സന്നാഹങ്ങളുമായി മുഖ്യമന്ത്രി യാത്ര ചെയ്യുമ്പോൾ ട്രാഫിക്ക് നിയന്ത്രണത്തിന്റെ പേരിൽ ജനങ്ങൾ പൊരി വെയിലത്ത് കാത്ത് കിടക്കുന്നത് സംസ്ഥാനത്തെ സ്ഥിരം കാഴ്ചകളിൽ ഒന്നാണെന്നും പ്രാണകുമാര്‍ വിമര്‍ശിച്ചു.