പിടി തോമസിന്റെ കുടുംബത്തെ ചേര്‍ത്തുപിടിച്ച് രാഹുല്‍ ഗാന്ധി ! പ്രിയ നേതാവിനെ അവസാനമായി ഒരു നോക്ക് കാണാനെത്തിയ രാഹുല്‍ ഗാന്ധി മടങ്ങിയത് ഉമയേയും മക്കളെയും തന്നോട് ചേര്‍ത്ത് പിടിച്ച് ആശ്വസിപ്പിച്ച് ! 15 മിനിറ്റിലേറെ സഹപ്രവര്‍ത്തകന്റെ മൃതദേഹത്തിനരികെ ചിലവഴിച്ച് രാഹുല്‍ ഗാന്ധി

കൊച്ചി: അന്തരിച്ച മുതിര്‍ന്ന കോണ്‍ഗ്രസ് നേതാവ് പി ടി തോമസിന് നാടിന്റെ അന്ത്യാഞ്ജലി. പിടിക്ക് അന്തിമോപചാരമര്‍പ്പിക്കാന്‍ മുന്‍ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയെത്തി. ഉച്ചയ്ക്ക് 1.15ഓടെയാണ് രാഹുല്‍ ഗാന്ധി എറണാകുളം ടൗണ്‍ ഹാളില്‍ എത്തിയത്.

പിടി തോമസിന്റെ ഭാര്യ ഉമ, മക്കളായ വിഷ്ണു, വിവേക് എന്നിവരെ ചേര്‍ത്തുപിടിച്ചാണ് രാഹുല്‍ ആശ്വസിപ്പിച്ചത്. പിടിയുടെ അവസാന സമയങ്ങളിലെ കാര്യങ്ങളും അദ്ദേഹം വിശദമായി ചോദിച്ചറിഞ്ഞു. ഭാര്യയെയും മക്കളെയും ആശ്വസിപ്പിച്ച ശേഷം നേതാക്കളോടും അദ്ദേഹം വിവരങ്ങള് ചോദിച്ചറിഞ്ഞു.

15 മിനിറ്റോളം ടൗണ്‍ ഹാളില്‍ മൃതദേഹത്തിനൊപ്പം ചിലവഴിച്ച ശഷമാണ് രാഹുല്‍ മടങ്ങിയത്. നേരത്തെ രാവിലെ 8 മണിക്ക് ആദാരാഞ്ജലി അര്‍പ്പിച്ച് ഡല്‍ഹിക്ക് മടങ്ങാനായിരുന്നു രാഹുലിന്റെ തീരുമാനം. പക്ഷേ പിടിയുടെ മൃതദേഹം വിലാപയാത്രയായി കൊച്ചിയിലേക്ക് കൊണ്ടുവന്നപ്പോള്‍ വൈകുകയായിരുന്നു.

നേരത്തെ 10.30 മണിയോടെപാലാരിവട്ടത്തെ വീട്ടില്‍ നിന്ന് മൃതദേഹം വിലാപയാത്രയായി എറണാകുളം ഡിസിസി ഓഫീസിലേക്കാണ് എത്തിച്ചത്. 20 മിനിറ്റിന് ശേഷം ടൗണ്‍ഹാളിലും മൃതദേഹം പൊതുദര്‍ശനത്തിന് എത്തിച്ചു.

വൈകിട്ടോടെ കാക്കാനാട് കമ്മ്യൂണിറ്റി ഹാളില്‍ എത്തിക്കുന്ന മൃതദേഹത്തില്‍ മുഖ്യമന്ത്രി പിണറായി വിജയന്‍ ഉള്‍പ്പെടെയുള്ള നേതാക്കള്‍ അന്തിമോപചാരം അര്‍പ്പിക്കും.