പാലക്കാട്: ജില്ലയിൽ ജൂലൈ 5 മുതൽ 8 വരെയും 10 മുതൽ 13 വരെയും 19 മുതൽ 27 വരെയും പുലർച്ചെ നാലു മുതൽ ഉച്ചയ്ക്ക് രണ്ടുവരെ പി.എസ്.സി നടത്തുന്ന പൊലീസ് കോൺസ്റ്റബിൾ ഐ.ആർ.ബി കമാൻഡോ വിംഗ് തസ്തികയിലേക്കുള്ള തെരഞ്ഞെടുപ്പിന്റെ ഭാഗമായി ഉദ്യോഗാർഥികൾക്കുള്ള കായികക്ഷമത പരീക്ഷ രണ്ട് സ്ഥലങ്ങളിലായി നടക്കുന്നു.
റെയിൽവേ കോളനി കേന്ദ്രീയ വിദ്യാലയത്തിനു സമീപത്തുനിന്നും തുടങ്ങി ധോണി എക്കോ ടൂറിസം സെന്റർവരെയുള്ള റോഡിലും കഞ്ചിക്കോട് ഗ്രാമലക്ഷ്മി മുദ്രാലയത്തിന് സമീപത്തുനിന്നും തുടങ്ങി മലമ്പുഴ റോക്ക് ഗാർഡൻ വരെയുള്ള റോഡിലുമാണ് കായികക്ഷമത പരീക്ഷ നടക്കുന്നത്.
ഈ ദിവസങ്ങളിൽ ആൾതിരക്ക് ഉണ്ടാകാൻ സാധ്യതയുള്ളതിനാൽ ഈ റോഡുകളിൽ ഗതാഗതനിന്ത്രണം ഉണ്ടായിരിക്കുമെന്ന് പാലക്കാട് ഡിവൈ.എസ്.പി അറിയിച്ചു. ഈ ദിവസങ്ങളിൽ മലമ്പുഴയിൽനിന്നും കഞ്ചിക്കോട് ഭാഗത്തേക്ക് പോകുന്ന വാഹനങ്ങൾ മലമ്പുഴ ഗാർഡന്റെ മുൻവശംവെച്ച് തിരിച്ചുവിടും.
കഞ്ചിക്കോടുനിന്ന് മലമ്പുഴയിലേക്ക് വരുന്ന വാഹനങ്ങൾ എൻ.എച്ചിന് താഴെ ഓവർബ്രിഡ്ജിൽവെച്ച് തിരിച്ചുവിടുന്നതാണ്. ആനക്കൽ മലമ്പുഴ ഭാഗത്തേക്ക് പുല്ലാംകുന്ന് വഴി പോകുന്ന പ്രദേശിവാസികളെ ടെസ്റ്റിന് ഇടയിലുള്ള സമയക്രമം വെച്ച് കടത്തിവിടും.
ഒലവക്കോട്-താണാവ് ഭാഗത്തുനിന്നും അകത്തേത്തറ എൻ.എസ്.എസ് എഞ്ചിനീയറിംഗ് കോളജ്, ചിത്ര ജംഗ്ഷൻ, മലമ്പുഴ ഭാഗത്തേക്ക് പോകുന്ന യാത്രക്കാർ കല്ലേക്കുളങ്ങര എ ടു ഇസഡ് എന്ന സ്ഥാപനത്തിന് വലതുഭാഗത്തുള്ള റോഡ് വഴി പോകണം. പൊതുജനങ്ങൾ ഈ ദിവസങ്ങളിൽ ഇതുവഴിയുള്ള അനാവശ്യ യാത്രകൾ പരമാവധി ഒഴിവാക്കണമെന്നും പൊലീസ് അറിയിച്ചു.