റാന്നി നോളജ് വില്ലേജിന്റെ ഭാഗമായി ജ്വാല പഠന പദ്ധതിയോടനുബന്ധിച്ച് ഇൻസൈറ്റിന്‍റെ സഹകരണത്തോടെ റാന്നി നിയോജക മണ്ഡലത്തിലെ വിവിധ സർക്കാർ എയ്ഡഡ് സ്കൂളുകളിലെ വിദ്യാര്‍ത്ഥികളെ ഓണ്‍ലൈനായി കണക്ക് പഠിപ്പിക്കുന്ന പദ്ധതിക്ക് തുടക്കമായി

റാന്നി: ഗണിതത്തെ ഇനി ഭയപ്പെടേണ്ട, പ്രത്യേകിച്ച് കോളേജിലെ ചേട്ടന്മാരും ചേച്ചിമാരും എളുപ്പവഴിയിൽ ക്ലാസ് എടുക്കുമ്പോൾ... റാന്നി നോളജ് വില്ലേജിന്റെ ഭാഗമായി കുട്ടികൾക്ക് കണക്ക് എളുപ്പം മനസ്സിലാക്കി കണക്കിനോടുള്ള ഭയം ഒഴിവാക്കുന്നതിനായി വിവിധ സർക്കാർ സ്കൂളുകളിലും എയിഡഡ് സ്കൂളുകളിലും ഏർപ്പെടുത്തിയ പഠന പദ്ധതിയാണ് ജ്വാല.

ഇൻസൈറ്റിന്റെ സഹകരണത്തോടെ റാന്നി നിയോജക മണ്ഡലത്തിലെ വിവിധ സർക്കാർ എയ്ഡഡ് സ്കൂളുകളുടെ എട്ടു മുതൽ 10 വരെ ക്ലാസുകളിലെ വിദ്യാർത്ഥികൾക്കാണ് കോളേജ് വിദ്യാർത്ഥികൾ ഓൺലൈനിൽ കണക്ക് പഠിപ്പിക്കുന്നത്.

പദ്ധതിയുടെ തുടക്കമായി റാന്നി എം എസ് ഹയർ സെക്കൻഡറി സ്കൂളിലെയും വെൺകുറിഞ്ഞി എസ്എൻഡിപി ഹയർ സെക്കൻഡറി സ്കൂളിലെയും 200 വിദ്യാർത്ഥികൾക്കാണ് കണക്കിന്റെ അടിസ്ഥാന പാഠങ്ങൾ പകർന്നു നൽകാൻ ആരംഭിച്ചത്.

കുട്ടികൾക്ക് ഇഷ്ടവിഷയമാക്കി കണക്ക് മാറ്റിയെടുക്കുന്നതിനൊപ്പം വ്യക്തിത്വ വികസന ക്ലാസുകളും നൽകും . 16 ദിവസമാണ് ക്ലാസ് ഉണ്ടായിരിക്കുന്നത് ആഴ്ചയിൽ അഞ്ചുദിവസം വൈകിട്ട് ഓരോ മണിക്കൂർ വീതമാണ് ക്ലാസ്.

വിവിധ ജില്ലകളിലെ കോളേജുകളിൽ പഠിക്കുന്ന കുട്ടികളും ഇൻസൈറ്റിൽ നിന്നും ട്രെയിനിങ് ലഭിച്ച വാളണ്ടിയർമാരും ഇൻഫോസിസ് ഉൾപ്പെടെയുള്ള കമ്പനികളുടെ ജീവനക്കാരുമാണ് ക്ലാസ് നയിക്കുന്നത്. രക്ഷകർത്താക്കളുടെ മൊബൈൽ ഫോൺ വഴിയാണ് ക്ലാസ്. റാന്നിയിലെ മറ്റ് സ്കൂളുകളിലേക്കും പദ്ധതി വ്യാപിപ്പിക്കുമെന്ന് അഡ്വ പ്രമോദ് നാരായൺ എംഎൽഎ പറഞ്ഞു.

തിരുവനന്തപുരം കഴക്കൂട്ടം റോട്ടറി ക്ലബ്ബിന്റെ നേതൃത്വത്തിൽ സ്കൂളിൽ ആരംഭിച്ച ക്ലാസ് ക്ലബ്ബ് പ്രസിഡന്റ് ഷൈൻ സത്താർ ഉദ്ഘാടനം ചെയ്തു. പിടിഎ പ്രസിഡണ്ട് രാധിക അധ്യക്ഷയായി. ഇൻസൈറ്റ് ചീഫ് ഓപ്പറേറ്റിംഗ് ഓഫീസർ അജിത്ത് കുമാർ, എസ്എൻഡിപി യോഗം അസി സെക്രട്ടറി ബി രാജശ്രീ, ഹെഡ്മിസ്ട്രസ് പി ദീപ എന്നിവർ സംസാരിച്ചു.