മുംബൈ: ഐ.പി.എല് ഒത്തുകളി വിവാദത്തില് പ്രതികരണവുമായി മലയാളി താരം എസ് ശ്രീശാന്ത്. 10 ലക്ഷം രൂപയ്ക്കുവേണ്ടി താന് എന്തിനാണ് അങ്ങനെ ചെയ്യുന്നതെന്ന് ശ്രീശാന്ത് ചോദിക്കുന്നു. സ്പോര്ട്സ്കീടയ്ക്ക് നല്കിയ അഭിമുഖത്തില് സംസാരിക്കുകയായിരുന്നു ശ്രീശാന്ത്.
''ഒത്തുകളി വിവാദത്തെ കുറിച്ച് ഞാന് വിശദീകരിക്കുന്ന ആദ്യത്തെ അഭിമുഖമാവും ഇത്. ഒരു ഓവര്, 14 റണ്സ് എന്നതിനെ ചൊല്ലിയോ മറ്റോ ആയിരുന്നു വിഷയം. ഞാന് ചെയ്ത ആ ഓവറില് നാല് പന്തില് നിന്ന് അഞ്ച് റണ്സ് വഴങ്ങി. നോ ബോള് ഇല്ല, വൈഡ് ഇല്ല, ഒരു സ്ലോ ബോള് പോലുമില്ല. എന്റെ കാല്വിരലിലെ 12 ശസ്ത്രക്രിയകള്ക്ക് ശേഷവും 130ന് മുകളില് വേഗതയിലാണ് പന്തെറിഞ്ഞത്.''- ശ്രീശാന്ത് പറഞ്ഞു.
ഇറാനി ട്രോഫി കളിച്ച് ദക്ഷിണാഫ്രിക്കന് പര്യടനത്തിലുള്ള ഇന്ത്യന് ടീമില് ഇടം നേടുകയായിരുന്നു എന്റെ ലക്ഷ്യം. അങ്ങനെയുള്ള ഞാനെന്തിന് ഇത്തരത്തില് ചെയ്യണം.? ഞാനൊരു പാര്ട്ടി നടത്തുന്നത് പോലും രണ്ട് ലക്ഷം രൂപയ്ക്കാണ്.
ജീവിത്തില് ഞാനൊരുപാട് പേര്ക്ക് സഹായം നല്കിയിട്ടുണ്ട്. അവരുടെയെല്ലാം പ്രാര്ത്ഥനയാണ് എന്നെ പുറത്തെത്തിച്ചത്.'' ശ്രീശാന്ത് പറഞ്ഞുനിര്ത്തി. വാതുവെയ്പ്പിനെ തുടര്ന്ന് ആജിവനാന്ത വിലക്ക് നേരിട്ടെങ്കിലും സുപ്രീംകോടതി വിധിയെ തുടര്ന്ന് ബിസിസിഐക്ക് ഇത് പിന്വലിക്കേണ്ടതായി വന്നു. വിലക്ക് കാലാവധി കഴിഞ്ഞ ശ്രീശാന്ത് കേരള ടീമില് ഇടംപിടിച്ചിരുന്നു.