മത ന്യൂനപക്ഷങ്ങളെ ഉൻമൂലനം ചെയ്യാൻ പദ്ധതിയിടുന്ന ആർഎസ്എസിനെ സംരക്ഷിക്കേണ്ട ബാധ്യത ആർക്കാണ് ? ആർഎസ്എസ് അന്നും ഇന്നും ആർഎസ്എസ് തന്നെയാണ്. 'ഹേ റാം' എന്നുച്ചരിച്ച് മഹാത്മാവ് പിടഞ്ഞു വീണത് ഓട്ടോറിക്ഷയിടിച്ചല്ല. അതെങ്കിലും മറക്കാതിരുന്നു കൂടെ. രൂക്ഷവിരമർശനവുമായി മുസ്ലീം ലീഗ്, ശാഖകൾക്ക് സംരക്ഷണം നൽകിയെന്ന കെ സുധാകരന്റെ വെളിപ്പടുത്തലിൽ യുഡിഎഫിൽ പൊട്ടിത്തെറി !

തിരുവനന്തപുരം: ആർഎസ്എസ് ശാഖകൾക്ക് സംരക്ഷണം നൽകിയിട്ടുണ്ടെന്ന കെപിസിസി പ്രസിഡന്റ് കെ സുധാകരന്റെ വെളിപ്പെടുത്തലിന് പിന്നാലെ യുഡിഎഫിൽ പൊട്ടിത്തെറി. പ്രധാന ഘടകക്ഷിയായ മുസ്ലീം ലീഗാണ് ആദ്യവെടിപൊട്ടിച്ചത്. മുൻ മന്ത്രിയും ലീഗ് നേതാവുമായ അബ്ദുറബ്ബ് അതിരൂക്ഷമായ വിമർശനമാണ് ഉന്നയിച്ചിരുക്കുന്നത്. ആർഎസ്എസിന്റെ മൗലികാവകാശങ്ങൾക്കു
വേണ്ടി ശബ്ദിക്കാൻ, ആർഎസ്എസിന്റെ ശാഖകൾക്കു സംരക്ഷണം നൽകാൻ ആർഎസ്എസ് എപ്പോഴെങ്കിലും മറ്റുള്ളവരുടെ മൗലികാവകാശങ്ങൾക്കു വില കൽപ്പിച്ചിട്ടുണ്ടോ ? എന്നാണ് അബ്ദുറബ്ബ് സുധാകരനോട് ചോദിക്കുന്നത്.

മത ന്യൂനപക്ഷങ്ങൾക്കും, മർദ്ദിത പീഢിത വിഭാഗങ്ങൾക്കും ജീവിക്കാനും, വിശ്വസിക്കാനും, ആരാധിക്കാനും, പ്രബോധനം ചെയ്യാനും ഇഷ്ടഭക്ഷണം കഴിക്കാനും വരെ ഭരണഘടനാപരമായ അവകാശങ്ങൾ നിഷേധിക്കുകയും, അവരെ ഉൻമൂലനം ചെയ്യാൻ പദ്ധതിയിടുകയും ചെയ്യുന്ന ആർഎസ്എസിനെ സംരക്ഷിക്കേണ്ട ബാധ്യത ആർക്കാണ്.

ആർഎസ്എസ് അന്നും, ഇന്നും ആർഎസ്എസ് തന്നെയാണെന്ന് റബ്ബ് പറുന്നു.'ഹേ റാം' എന്നുച്ചരിച്ച് മഹാത്മാവ് പിടഞ്ഞു വീണത് ഓട്ടോറിക്ഷയിടിച്ചല്ല, ആർഎസ്എസുകാരൻ വെടിയുതിർത്തിട്ടാണെന്നും അതെങ്കിലും മറക്കാതിരുന്നു കൂടെയെന്നും റബ്ബ് ചോദിക്കുന്നുണ്ട്. സുധാകരന്റെ വെളിപ്പെടുത്തലിന് പിന്നാലെ വലിയ അത്യപ്തിയാണ് ലീഗിനുള്ളത്.

ഇന്നലെ സിഎംപി ജില്ലാ കൗൺസിൽ നടത്തിയ, എംവിആർ അനുസ്മരണ ചടങ്ങ് ഉദ്ഘാടനം ചെയ്യുന്നതിനിടെയായിരുന്നു സുധാകരന്റെ വെളിപ്പെടുത്തൽ. കെഎസ്യു പ്രവർത്തകനായിരിക്കെ കിഴുന്ന, തോട്ടട എന്നിവിടങ്ങളിൽ ആർഎസ്എസ് ശാഖ അടിച്ചു തകർക്കാൻ സിപിഎം ശ്രമിച്ചപ്പോൾ ആളെ അയച്ച് ശാഖയ്ക്കു താൻ സംരക്ഷണം നൽകിയിരുന്നുവന്നും എന്നാൽ അത് ആർഎസ്എസിനോടുള്ള ആഭിമുഖ്യം കൊണ്ടല്ലെന്നും സുധാകരൻ പറഞ്ഞു.

'ശാഖയോടും ശാഖയുടെ ലക്ഷ്യത്തോടും ആർഎസ്എസിനോടും ആഭിമുഖ്യമുണ്ടായിട്ടല്ല ഇതു ചെയ്തത്. ജനാധിപത്യ അവകാശം നിലനിൽക്കുന്ന സ്ഥലത്ത്, മൗലികാവകാശം തകർക്കപ്പെടുന്നതു നോക്കി നിൽക്കുന്നതു ജനാധിപത്യ വിശ്വാസിക്കു ഗുണകരമല്ല എന്ന തോന്നലാണതിനു പ്രേരിപ്പിച്ചത്.

ഞാനൊരിക്കലും ആർഎസ്എസിന്റെ ഒരു തരത്തിലുള്ള പ്രവർത്തനത്തോടും സഹകരിച്ചിട്ടില്ല, പിന്തുണ പ്രഖ്യാപിച്ചിട്ടില്ല, ബന്ധപ്പെട്ടിട്ടുമില്ല. ആവിഷ്‌കാര സ്വാതന്ത്ര്യവും രാഷ്ട്രീയ സ്വാതന്ത്ര്യവും ഓരോ പൗരന്റെയും ജന്മാവകാശമാണ്, അതു നിലനിർത്തണം. നാടിന്റെ സാമൂഹിക സാമ്പത്തിക സുരക്ഷിതത്വത്തിനും മതനിരപേക്ഷതയ്ക്കും പോറലേൽക്കാതെ നടത്തുന്ന ഏതു പ്രവർത്തനത്തെയും നമ്മൾ സഹായിക്കേണ്ട സാഹചര്യം മതനിരപേക്ഷ ജനാധിപത്യരാഷ്ട്രത്തിലുണ്ടാകും. ശരിയോ തെറ്റോ എന്നതു വിവാദമാകാമെന്ന സംശയവും അദ്ദേഹം പ്രകടിപ്പിച്ചു.

സുധാകരന്റെ സംശയം തെറ്റിയില്ല. പ്രസംഗം വിവാദമായതോടെ കെ.സുധാകരൻ മാധ്യമപ്രവർത്തകരോടു പ്രതികരിച്ചതിങ്ങനെ: മൗലികമായി പ്രവർത്തിക്കാനുള്ള അവസരം ഏതു രാഷ്ട്രീയ പാർട്ടിക്കു നഷ്ടമായാലും കോൺഗ്രസ് ഇടപെടും. സിപിഎമ്മിനും സംരക്ഷണം നൽകും. ബിജെപിയിൽ പോകണോ വേണ്ടയോ എന്നൊക്കെ തീരുമാനിക്കുന്നതു ഞാനാണ്. അതിന് ആരുടെയും ഉപദേശവും പിന്തുണയും വേണ്ട. പോകണോ വേണ്ടയോ എന്നൊക്കെ ആലോചിക്കാനുള്ള ബുദ്ധിയുണ്ട്.

ഇതിനു ശേഷം നൽകിയ വിശദീകരണക്കുറിപ്പിൽ എംവിആർ അനുസ്മരണ ചടങ്ങിൽ പറഞ്ഞ കാര്യങ്ങൾ ദുർവ്യാഖ്യാനം ചെയ്ത് തെറ്റായ സന്ദേശം നൽകാനുള്ള ബോധപൂർവമായ ശ്രമമാണു നടക്കുന്നതെന്ന് അദ്ദേഹം ആരോപിച്ചു. എം.വി.രാഘവനെതിരെ നടന്ന അക്രമ സംഭവങ്ങളുടെ ചരിത്രവുമായി ബന്ധപ്പെട്ടു നടത്തിയ പ്രസംഗത്തിന്റെ ഒരുഭാഗം അടർത്തിയെടുത്ത് മനഃപൂർവം വിവാദമുണ്ടാക്കുകയാണ്.

കണ്ണൂരിൽ സിപിഎം ഓഫിസുകൾ തകർക്കപ്പെട്ടപ്പോൾ, അവർക്കും സംരക്ഷണം നൽകിയ പാർട്ടിയാണു കോൺഗ്രസ്. അർഹമായ അവകാശം നിഷേധിക്കപ്പെടുന്നിടത്തെല്ലാം കോൺഗ്രസ് ശക്തമായി പ്രതിഷേധിക്കുകയും പ്രതികരിക്കുകയും ചെയ്തിട്ടുണ്ട്. അവർക്ക് എല്ലാ സംരക്ഷണവും നൽകിയിട്ടുമുണ്ട്. ന്യൂനപക്ഷങ്ങളുടെ അവകാശം സംരക്ഷിക്കാനും പോരാടിയിട്ടുണ്ട്. തെറ്റ് ഏതു ഭാഗത്താണെങ്കിലും ചൂണ്ടിക്കാട്ടിയ പാരമ്പര്യമാണു കോൺഗ്രസിന്റേത്. അദ്ദേഹം വ്യക്തമാക്കി. എന്നാൽ സ്വന്തം പാളയത്തിലുള്ളവർ പോലും സുധാരകന്റെ വിശദീകരണത്തിൽ തൃപ്തരല്ല.