നക്സലിസത്തിനെതിരെ വീണ്ടും രൂക്ഷ വിമർശനവുമായി അമിത് ഷാ, നക്സലിസം ഇല്ലാതാക്കുന്നതിന് പുതിയ സമയപരിധി നിശ്ചയിച്ചു

ഡല്‍ഹി: അടുത്ത അഖിലേന്ത്യാ ഡയറക്ടര്‍ ജനറല്‍, ഇന്‍സ്‌പെക്ടര്‍ ജനറല്‍ ഓഫ് പോലീസ് സമ്മേളനത്തിന് മുമ്പ് നക്‌സലിസം ഇല്ലാതാക്കുമെന്ന്  കേന്ദ്ര ആഭ്യന്തര മന്ത്രി അമിത് ഷാ.

ഛത്തീസ്ഗഡിലെ റായ്പൂരില്‍ നടക്കുന്ന മൂന്ന് ദിവസത്തെ ഡിജിപി, ഐജിപി സമ്മേളനത്തിന്റെ ഉദ്ഘാടന സെഷനില്‍ സംസാരിക്കവെയാണ് കേന്ദ്ര ആഭ്യന്തര മന്ത്രി ഈ പ്രസ്താവന നടത്തിയത്.

അടുത്ത സമ്മേളനത്തിന് മുമ്പ് രാജ്യം നക്‌സലിസത്തിന്റെ ഭീഷണിയില്‍ നിന്ന് പൂര്‍ണ്ണമായും മുക്തമാകുമെന്ന് അമിത് ഷാ പറഞ്ഞതായി ആഭ്യന്തര മന്ത്രാലയത്തിന്റെ പ്രസ്താവനയില്‍ പറയുന്നു. 

നക്‌സലിസത്തെ വേരോടെ പിഴുതെറിയാന്‍ നരേന്ദ്ര മോദി സര്‍ക്കാര്‍ സ്വീകരിച്ച നടപടികള്‍ ഉദ്ധരിച്ച്, കഴിഞ്ഞ ഏഴ് വര്‍ഷത്തിനുള്ളില്‍ 586 ശക്തമായ പോലീസ് സ്റ്റേഷനുകള്‍ നിര്‍മ്മിച്ച് കേന്ദ്രം സുരക്ഷാ ഗ്രിഡ് ശക്തിപ്പെടുത്തിയിട്ടുണ്ടെന്ന് അദ്ദേഹം പറഞ്ഞു.

തല്‍ഫലമായി, നക്‌സല്‍ ബാധിത ജില്ലകളുടെ എണ്ണം 2014 ല്‍ 126 ല്‍ നിന്ന് ഇന്ന് വെറും 11 ആയി കുറഞ്ഞുവെന്ന് മന്ത്രാലയം അറിയിച്ചു.

നക്‌സലിസം, വടക്കുകിഴക്കന്‍ മേഖല, ജമ്മു കശ്മീര്‍ എന്നീ മൂന്ന് ഹോട്ട്സ്പോട്ടുകള്‍ക്ക് മോദി സര്‍ക്കാര്‍ ശാശ്വത പരിഹാരങ്ങള്‍ നല്‍കിയിട്ടുണ്ടെന്നും ഈ പ്രദേശങ്ങള്‍ താമസിയാതെ രാജ്യത്തിന്റെ മറ്റ് ഭാഗങ്ങളെപ്പോലെയാകുമെന്നും അമിത്ഷാ സമ്മേളനത്തില്‍ പറഞ്ഞു.