പഞ്ചാബ് ദേര ബാസിയിൽ പോലീസ് ഏറ്റുമുട്ടലിൽ ബിഷ്‌ണോയി ഗുണ്ടാസംഘത്തിലെ നാല് വെടിവെപ്പുകാർ അറസ്റ്റിൽ; ആയുധങ്ങൾ കണ്ടെടുത്തു

മൊഹാലി: പഞ്ചാബിലെ മൊഹാലി ജില്ലയിലെ ദേര ബാസി-അംബാല ഹൈവേയിലെ സ്റ്റീല്‍ സ്ട്രിപ്സ് ടവേഴ്സിന് സമീപം പോലീസ് ഏറ്റുമുട്ടലിനെത്തുടര്‍ന്ന് ലോറന്‍സ് ബിഷ്ണോയി സംഘവുമായി ബന്ധപ്പെട്ട നാല് ഷൂട്ടര്‍മാരെ അറസ്റ്റ് ചെയ്തു. ഇവര്‍ ഗുണ്ടാസംഘം ഗോള്‍ഡി ദില്ലന്റെ പ്രവര്‍ത്തകരായിരുന്നു.

പോലീസ് വെടിവെപ്പില്‍ നാല് അക്രമികളില്‍ രണ്ടുപേര്‍ക്ക് പരിക്കേറ്റു, അവരില്‍ ഒരാളുടെ നില ഗുരുതരമാണെന്നാണ് റിപ്പോര്‍ട്ട്. ഏറ്റുമുട്ടല്‍ വിദഗ്ധന്‍ വിക്രം ബരാദ് ഓപ്പറേഷന് നേതൃത്വം നല്‍കി.

ഏറ്റുമുട്ടലില്‍ ഇരുവശത്തുനിന്നും ഏകദേശം 15 റൗണ്ട് വെടിയുതിര്‍ത്തതായാണ് വിവരം. പോലീസ് സംഘത്തിലെ രണ്ട് അംഗങ്ങള്‍ക്ക് വെടിയേറ്റെങ്കിലും അവരുടെ ബുള്ളറ്റ് പ്രൂഫ് ജാക്കറ്റുകള്‍ ഗുരുതരമായ പരിക്കുകള്‍ ഒഴിവാക്കി.

'ദേര ബാസി-അംബാല ഹൈവേയിലെ സ്റ്റീല്‍ സ്ട്രിപ്‌സ് ടവേഴ്സിന് സമീപം ഇന്ന് ഉച്ചയ്ക്ക് ശേഷം നടന്ന വെടിവയ്പ്പിനെ തുടര്‍ന്ന്, ലോറന്‍സ് ബിഷ്ണോയി സംഘത്തിലെ നാല് പ്രവര്‍ത്തകരെ ആന്റി-ഗ്യാങ്സ്റ്റര്‍ ടാസ്‌ക് ഫോഴ്സും എസ്എഎസ് നഗര്‍ പോലീസും പിടികൂടി. 

ദേശീയപാതയോരത്തെ ഒരു വീട്ടില്‍ ഒളിച്ചിരുന്ന പ്രതികള്‍ പോലീസിന് നേരെ വെടിയുതിര്‍ത്തു. പ്രതികാര നടപടിയില്‍, സംഘത്തിലെ രണ്ട് അംഗങ്ങള്‍ക്ക് വെടിയേറ്റു,' പഞ്ചാബ് ഡിജിപി എക്സില്‍ പോസ്റ്റ് ചെയ്തു.