"വിപണിയിലെ കയറ്റിറക്കങ്ങൾ സ്വാഭാവികം": ബജറ്റ് ദിനത്തിലെ തകർച്ചയെ തള്ളി പ്രധാനമന്ത്രിയുടെ സാമ്പത്തിക ഉപദേഷ്ടാവ്

ഡല്‍ഹി: കേന്ദ്ര ബജറ്റ് അവതരണത്തിന് പിന്നാലെ ഓഹരി വിപണിയിലുണ്ടായ ഇടിവ് ബജറ്റിന്റെ വിജയത്തെയോ പരാജയത്തെയോ സൂചിപ്പിക്കുന്ന ഒന്നല്ലെന്ന് പ്രധാനമന്ത്രിയുടെ സാമ്പത്തിക ഉപദേഷ്ടാവ് സഞ്ജീവ് സന്യാല്‍. 

ധനമന്ത്രി നിര്‍മല സീതാരാമന്‍ ബജറ്റ് അവതരിപ്പിച്ചതിന് പിന്നാലെ ഓഹരി വിപണിയില്‍ 2 ശതമാനത്തോളം ഇടിവ് രേഖപ്പെടുത്തിയിരുന്നു. ഏകദേശം 10 ലക്ഷം കോടി രൂപയുടെ നിക്ഷേപക ആസ്തിയാണ് ഇതിലൂടെ തുടച്ചുനീക്കപ്പെട്ടത്. ഓഹരി ഇടപാടുകള്‍ക്കുള്ള നികുതി വര്‍ധിപ്പിച്ചതാണ് വിപണിയെ പ്രകോപിപ്പിച്ചത് എന്നായിരുന്നു വിലയിരുത്തല്‍. എന്നാല്‍ ഇതിനെക്കുറിച്ച് സഞ്ജീവ് സന്യാല്‍ പറഞ്ഞത് ഇങ്ങനെ:

'വിപണികള്‍ മുകളിലേക്കും താഴേക്കും പോയിക്കൊണ്ടിരിക്കും. കഴിഞ്ഞ 50 ബജറ്റുകള്‍ പരിശോധിച്ചാല്‍, ബജറ്റ് ദിനത്തിലെ വിപണിയുടെ പ്രതികരണം ആ ബജറ്റിന്റെ ദീര്‍ഘകാല ഫലത്തെ സൂചിപ്പിക്കുന്നതായി കാണാന്‍ കഴിയില്ല. സാമ്പത്തിക വിപണിയില്‍ കാല്‍നൂറ്റാണ്ടോളം ചെലവഴിച്ച വ്യക്തി എന്ന നിലയില്‍, ഒരു പ്രത്യേക ദിവസത്തെ വിപണി ചലനങ്ങളെക്കുറിച്ച് ഞാന്‍ ആശങ്കപ്പെടാറില്ല.'

ബജറ്റിനെ ഒരു ഗൗരവമേറിയ പ്രായോഗിക പ്രവര്‍ത്തനമായാണ് അദ്ദേഹം വിശേഷിപ്പിച്ചത്. സാധാരണക്കാര്‍ക്ക് പെട്ടെന്ന് മനസ്സിലാകാത്ത എന്നാല്‍ സാമ്പത്തിക വിദഗ്ധര്‍ക്ക് പ്രാധാന്യമുള്ള പല കാര്യങ്ങളും ഇതിലൂടെ നടപ്പിലാക്കിയെന്ന് അദ്ദേഹം പറഞ്ഞു.

കോവിഡ് കാലത്ത് ഉയര്‍ന്ന സാമ്പത്തിക കടം വ്യവസ്ഥാപിതമായി കുറച്ചുകൊണ്ടുവരാന്‍ ഈ ബജറ്റിലൂടെ സാധിച്ചു. വരും വര്‍ഷങ്ങളില്‍ ഇത് 4.3 ശതമാനമായും അതിനുശേഷം 4 ശതമാനത്തിന് താഴെയായും കുറയ്ക്കാനാണ് സര്‍ക്കാര്‍ ലക്ഷ്യമിടുന്നത്.

ആഗോളതലത്തില്‍ പല വികസിത രാജ്യങ്ങളിലും കടം നിയന്ത്രണാതീതമായി വര്‍ധിക്കുമ്പോള്‍, ഇന്ത്യയുടെ കടം-ജിഡിപി അനുപാതം നിലവിലെ 56 ശതമാനത്തില്‍ നിന്ന് ഈ ദശകത്തിന്റെ അവസാനത്തോടെ 50 ശതമാനത്തില്‍ താഴെ എത്തിക്കാന്‍ കഴിയുമെന്ന് അദ്ദേഹം ആത്മവിശ്വാസം പ്രകടിപ്പിച്ചു.

വലിയ ആഘോഷങ്ങളില്ലാത്ത, എന്നാല്‍ ഭരണസംവിധാനത്തിലെ പോരായ്മകള്‍ പരിഹരിക്കുന്ന 'ബോറിങ്' എന്ന് തോന്നാവുന്ന മാറ്റങ്ങള്‍ക്കാണ് സര്‍ക്കാര്‍ മുന്‍ഗണന നല്‍കുന്നതെന്ന് സന്യാല്‍ പറഞ്ഞു.

ഇറക്കുമതിയും കയറ്റുമതിയും വേഗത്തിലാക്കാന്‍ എക്‌സ്-റേ അധിഷ്ഠിത പരിശോധനാ സംവിധാനങ്ങള്‍ ഏര്‍പ്പെടുത്തുന്നത് പോലുള്ള ചെറിയ മാറ്റങ്ങള്‍ ഇതിന് ഉദാഹരണമാണ്.

നികുതി ഉദ്യോഗസ്ഥരുടെ ഭാഗത്തുനിന്നുള്ള അനാവശ്യ ഇടപെടലുകളും പീഡനങ്ങളും ഒഴിവാക്കാന്‍ നിയമങ്ങളിലെ സങ്കീര്‍ണ്ണതകള്‍ കുറയ്ക്കാന്‍ ബജറ്റില്‍ ശ്രമിച്ചിട്ടുണ്ടെന്നും അദ്ദേഹം കൂട്ടിച്ചേര്‍ത്തു.