ദിത്വാ ചുഴലിക്കാറ്റ്: തമിഴ്‌നാട്ടിൽ കനത്ത മഴ; വിമാന, ട്രെയിൻ സർവീസുകൾ തടസ്സപ്പെട്ടു

ചെന്നൈ: തമിഴ്നാടിന്റെ ചില ഭാഗങ്ങളില്‍ കനത്ത മഴ. ദിത്വാ ചുഴലിക്കാറ്റ് തെക്കന്‍ സംസ്ഥാനത്തേക്ക് നീങ്ങുന്നു. ദിത്വാ ചുഴലിക്കാറ്റും അതിനെ തുടര്‍ന്നുണ്ടായ കനത്ത മഴയും മൂലം രാമനാഥപുരം, നാഗപട്ടണം ജില്ലകളാണ് ഏറ്റവും കൂടുതല്‍ ദുരിതമനുഭവിച്ചത്, അവിടെ സാധാരണ ജീവിതത്തെ സാരമായി ബാധിച്ചു. 

ഇന്ത്യന്‍ കാലാവസ്ഥാ വകുപ്പിന്റെ കണക്കനുസരിച്ച്, ദിത്വാ ചുഴലിക്കാറ്റ് ഞായറാഴ്ച കരയില്‍ ആഞ്ഞടിക്കും. ചെന്നൈയ്ക്ക് സമീപം ഇത് കരയില്‍ ആഞ്ഞടിക്കുമോ എന്ന് ഇപ്പോഴും വ്യക്തമല്ലെങ്കിലും, ഏത് സാഹചര്യത്തെയും നേരിടാന്‍ പൂര്‍ണ്ണമായും സജ്ജമാണെന്ന് സംസ്ഥാന സര്‍ക്കാര്‍ അറിയിച്ചു.  

'ശ്രീലങ്കയുടെ തീരത്തും അതിനോട് ചേര്‍ന്നുള്ള തെക്ക് പടിഞ്ഞാറന്‍ ബംഗാള്‍ ഉള്‍ക്കടലിലും രൂപം കൊണ്ട ദിത്വാ ചുഴലിക്കാറ്റ് കഴിഞ്ഞ 6 മണിക്കൂറിനുള്ളില്‍ മണിക്കൂറില്‍ 8 കിലോമീറ്റര്‍ വേഗതയില്‍ വടക്ക്-വടക്ക് പടിഞ്ഞാറന്‍ ദിശയിലേക്ക് നീങ്ങി, ഇന്ന് പുലര്‍ച്ചെ 5.30 ന് തെക്ക് പടിഞ്ഞാറന്‍ ബംഗാള്‍ ഉള്‍ക്കടലിലും അതിനോട് ചേര്‍ന്നുള്ള വടക്കന്‍ ശ്രീലങ്കയിലും കേന്ദ്രീകരിച്ചു,' ഐഎംഡി അറിയിച്ചു.

സംസ്ഥാനത്ത് ഇതുവരെ മരണമൊന്നും റിപ്പോര്‍ട്ട് ചെയ്തിട്ടില്ലെന്നും ദേശീയ ദുരന്ത നിവാരണ സേന (എന്‍ഡിആര്‍എഫ്), സംസ്ഥാന ദുരന്ത നിവാരണ സേന (എസ്ഡിആര്‍എഫ്) എന്നിവയുള്‍പ്പെടെ 28 ദുരന്ത നിവാരണ സംഘങ്ങള്‍ സജ്ജമാണെന്നും തമിഴ്നാട് റവന്യൂ, ദുരന്ത നിവാരണ മന്ത്രി കെകെഎസ്എസ്ആര്‍ രാമചന്ദ്രന്‍ മാധ്യമപ്രവര്‍ത്തകരോട് പറഞ്ഞു. ഇന്ത്യന്‍ വ്യോമസേനയും (ഐഎഎഫ്) ഇന്ത്യന്‍ കോസ്റ്റ് ഗാര്‍ഡും സ്ഥിതിഗതികള്‍ നിരീക്ഷിച്ചുവരികയാണെന്നും അദ്ദേഹം പറഞ്ഞു. 

'മഴ കാരണം ഇതുവരെ വലിയ നാശനഷ്ടങ്ങളൊന്നും ഉണ്ടായിട്ടില്ല,' രാമചന്ദ്രനെ ഉദ്ധരിച്ച് വാര്‍ത്താ ഏജന്‍സി പിടിഐ റിപ്പോര്‍ട്ട് ചെയ്തു. സംസ്ഥാന സര്‍ക്കാര്‍ സ്ഥിതിഗതികള്‍ നിരന്തരം നിരീക്ഷിച്ചുകൊണ്ടിരിക്കുകയാണ്, രക്ഷാപ്രവര്‍ത്തനങ്ങള്‍ക്കും ദുരിതാശ്വാസ പ്രവര്‍ത്തനങ്ങള്‍ക്കുമായി ടീമുകളെ സജ്ജമാക്കിയിട്ടുണ്ട്.'

വില്ലുപുരം, ചെങ്കല്‍പ്പട്ട്, തിരുവള്ളൂര്‍, നാഗപട്ടണം, തിരുവാരൂര്‍, തഞ്ചാവൂര്‍, പുതുക്കോട്ടൈ, മയിലാടുതുറൈ, ചെന്നൈ എന്നിവിടങ്ങളില്‍ എന്‍ഡിആര്‍എഫ് 14 ടീമുകളെ വിന്യസിച്ചിട്ടുണ്ടെന്ന് ഒരു ഉദ്യോഗസ്ഥന്‍ പറഞ്ഞു. ദിത്വാ ചുഴലിക്കാറ്റിനെത്തുടര്‍ന്ന് റെഡ് അലേര്‍ട്ട് പ്രഖ്യാപിച്ചിട്ടുള്ള കേന്ദ്രഭരണ പ്രദേശമായ പുതുച്ചേരിയിലും ഒരു അധിക ടീമിനെ വിന്യസിച്ചിട്ടുണ്ട്.

കാലാവസ്ഥ മെച്ചപ്പെടുന്നതുവരെ മത്സ്യത്തൊഴിലാളികള്‍ കടലില്‍ പോകുന്നത് ഒഴിവാക്കണമെന്നും ഭരണകൂടം ആവശ്യപ്പെട്ടു.