ദിത്വാ ചുഴലിക്കാറ്റ്: തമിഴ്‌നാട്ടിലെ സ്‌കൂളുകൾക്ക് അവധി; പോണ്ടിച്ചേരി സർവകലാശാല പരീക്ഷകൾ മാറ്റിവച്ചു

ഡല്‍ഹി: നവംബര്‍ 30 ന് തീരം തൊടുമെന്ന് പ്രതീക്ഷിക്കുന്ന ദിത്വ ചുഴലിക്കാറ്റിനെ തുടര്‍ന്ന് തമിഴ്നാട്ടിലെ വിവിധ ജില്ലകളില്‍ തുടരുന്ന കനത്ത മഴയുടെ പശ്ചാത്തലത്തില്‍ തിരുച്ചി, തഞ്ചാവൂര്‍, നാഗപട്ടണം ജില്ലകളിലെ സ്‌കൂളുകള്‍ക്ക് അവധി പ്രഖ്യാപിച്ചു.

അതേസമയം, പോണ്ടിച്ചേരി സെന്‍ട്രല്‍ യൂണിവേഴ്‌സിറ്റി നവംബര്‍ 29 ശനിയാഴ്ച നടത്താന്‍ നിശ്ചയിച്ചിരുന്ന എല്ലാ പരീക്ഷകളും മാറ്റിവച്ചതായി അറിയിച്ചു. 

'കോസ്റ്റ് ഗാര്‍ഡ് ഡിസ്ട്രിക്റ്റ്, പുതുച്ചേരിയില്‍ നിന്ന് ലഭിച്ച അറിയിപ്പ് അനുസരിച്ചും നവംബര്‍ 27 ലെ ഉപദേശക സര്‍ക്കുലറിന്റെ തുടര്‍ച്ചയായും, നവംബര്‍ 29 ന് നടത്താന്‍ നിശ്ചയിച്ചിരുന്ന എല്ലാ ക്ലാസുകളും പരീക്ഷകളും മാറ്റിവച്ചതായി ഇതിനാല്‍ അറിയിക്കുന്നു. 

മാറ്റിവച്ച പരീക്ഷകളുടെ പുതുക്കിയ ഷെഡ്യൂള്‍ യഥാസമയം അറിയിക്കും,' പോണ്ടിച്ചേരി സെന്‍ട്രല്‍ യൂണിവേഴ്‌സിറ്റി പുറത്തിറക്കിയ പ്രസ്താവനയില്‍ പറയുന്നു.