റെക്കോർഡ് ഉയരത്തിൽ നിന്ന് സ്വർണ്ണം താഴേക്ക്; നിക്ഷേപകർക്ക് വീണ്ടും വഴിതുറന്ന് കേന്ദ്ര ബജറ്റ്

ഡല്‍ഹി: റെക്കോര്‍ഡ് ഉയരത്തില്‍ നിന്ന് സ്വര്‍ണ്ണവില നേരിയ തോതില്‍ താഴ്ന്നതോടെ, വരാനിരിക്കുന്ന കേന്ദ്ര ബജറ്റില്‍ കണ്ണുനട്ടിരിക്കുകയാണ് നിക്ഷേപകര്‍.

ജനുവരി 29-ന് പത്ത് ഗ്രാം സ്വര്‍ണ്ണത്തിന് 1.80 ലക്ഷം രൂപ എന്ന ചരിത്രപരമായ നിരക്കിലെത്തിയ ശേഷം വിലയില്‍ ചെറിയ തിരുത്തലുകള്‍ ഉണ്ടായിട്ടുണ്ട്. നിലവില്‍ എം.സി.എക്‌സ് ഫെബ്രുവരി ഫ്യൂച്ചേഴ്‌സില്‍ സ്വര്‍ണ്ണവില 1.69 ലക്ഷം രൂപ എന്ന നിലയിലാണ് വ്യാപാരം നടക്കുന്നത്.

സ്വര്‍ണ്ണത്തിനൊപ്പം വെള്ളിയും നേരിയ ഇടിവ് രേഖപ്പെടുത്തിയിട്ടുണ്ട്. കിലോയ്ക്ക് 4.08 ലക്ഷം രൂപ എന്ന റെക്കോര്‍ഡില്‍ നിന്ന് 4.05 ലക്ഷം രൂപയിലേക്ക് വെള്ളി വില താഴ്ന്നു. എങ്കിലും ജനുവരി ആദ്യവാരത്തെ അപേക്ഷിച്ച് വില ഇപ്പോഴും ഉയര്‍ന്ന നിലയിലാണ്.

അന്താരാഷ്ട്ര വിപണിയിലും സമാനമായ മാറ്റങ്ങളാണ് ദൃശ്യമാകുന്നത്. ഔണ്‍സിന് 5,600 ഡോളറിന് മുകളില്‍ പോയ സ്വര്‍ണ്ണവിലയില്‍ ഏകദേശം 10 ശതമാനത്തോളം തിരുത്തല്‍ ഉണ്ടായിട്ടുണ്ട്.

ആഭരണ വിപണിയില്‍ ഉയര്‍ന്ന വില തിരിച്ചടിയുണ്ടാക്കിയെങ്കിലും നിക്ഷേപ മേഖലയില്‍ വലിയ മുന്നേറ്റമാണ് ഉണ്ടാകുന്നത്. 2025-ല്‍ ഗോള്‍ഡ് ഇ.ടി.എഫ് ആസ്തികള്‍ മൂന്നിരട്ടിയായി വര്‍ദ്ധിച്ചു. ഓഹരി വിപണിയിലെ അസ്ഥിരത നിക്ഷേപകരെ സുരക്ഷിത നിക്ഷേപമായ സ്വര്‍ണ്ണത്തിലേക്കും വെള്ളിയിലേക്കും ആകര്‍ഷിക്കുന്നു.

ഫെബ്രുവരി ഒന്നിന് അവതരിപ്പിക്കുന്ന കേന്ദ്ര ബജറ്റില്‍ ഇറക്കുമതി തീരുവയില്‍ മാറ്റമുണ്ടാകുമോ എന്നാണ് വിപണി ഉറ്റുനോക്കുന്നത്.

കഴിഞ്ഞ ബജറ്റില്‍ സ്വര്‍ണ്ണത്തിന്റെയും വെള്ളിയുടെയും ഇറക്കുമതി തീരുവ 15 ശതമാനത്തില്‍ നിന്ന് 6 ശതമാനമായി കുറച്ചിരുന്നു. കള്ളക്കടത്ത് തടയാന്‍ തീരുവ ഇനിയും കുറയ്ക്കണമെന്ന് ആഭരണ വ്യാപാരികള്‍ ആവശ്യപ്പെടുന്നു.

നിലവില്‍ 2 ലക്ഷം രൂപയ്ക്ക് മുകളിലുള്ള ആഭരണ വാങ്ങലിന് പാന്‍ കാര്‍ഡ് നിര്‍ബന്ധമാണ്. സ്വര്‍ണ്ണവില കുതിച്ചുയര്‍ന്ന സാഹചര്യത്തില്‍ സാധാരണ വിവാഹ ആവശ്യങ്ങള്‍ക്കും ഈ പരിധി കടക്കുന്നതിനാല്‍, പാന്‍ പരിധി ഉയര്‍ത്തണമെന്ന ആവശ്യവും ശക്തമാണ്.

സ്വര്‍ണ്ണത്തിന് ഇന്ത്യ പൂര്‍ണ്ണമായും ഇറക്കുമതിയെ ആശ്രയിക്കുന്നതിനാല്‍, രൂപയുടെ മൂല്യത്തകര്‍ച്ചയും വ്യാപാരക്കമ്മിയും പരിഗണിച്ച് ബജറ്റില്‍ എന്ത് തീരുമാനമുണ്ടാകുമെന്ന് നിക്ഷേപകര്‍ ആകാംക്ഷയോടെ കാത്തിരിക്കുന്നു. തിങ്കളാഴ്ച വിപണി തുറക്കുമ്പോള്‍ സ്വര്‍ണ്ണവിലയില്‍ വലിയ മാറ്റങ്ങള്‍ ഉണ്ടായേക്കാം.