പാക്കിസ്ഥാനേക്കാള്‍ കൂടുതല്‍ ആണവായുധങ്ങള്‍ ഇന്ത്യയ്ക്ക്, ചൈന ആയുധശേഖരം ഉയര്‍ത്തുന്നു: സ്വീഡിഷ് റിപ്പോര്‍ട്ട്

ഡല്‍ഹി: ഇന്ത്യക്ക് പാകിസ്ഥാനേക്കാള്‍ കൂടുതല്‍ ആണവായുധങ്ങളുണ്ടെന്ന് സ്വീഡിഷ് റിപ്പോര്‍ട്ട്. അതേസമയം ചൈന തങ്ങളുടെ ആണവായുധങ്ങള്‍ വര്‍ധിപ്പിക്കുകയാണെന്നും റിപ്പോര്‍ട്ട് പറയുന്നു. 2023 ജനുവരിയില്‍ 410 ആണവായുധങ്ങളാണ് ചൈനയ്ക്കുണ്ടായിരുന്നത്. ഇത് 2024 ജനുവരിയില്‍ 500 ആയി ഉയര്‍ത്തിയതായി റിപ്പോര്‍ട്ട് വ്യക്തമാക്കുന്നു.

കഴിഞ്ഞ രണ്ട് വര്‍ഷത്തിനിടെ ലോകം രണ്ട് യുദ്ധങ്ങള്‍ക്ക് സാക്ഷ്യം വഹിച്ചിരുന്നു. ഈ സാഹചര്യത്തില്‍ ഇന്ത്യ, പാകിസ്ഥാന്‍, ചൈന എന്നിവയുള്‍പ്പെടെ ഒമ്പത് ആണവായുധ രാജ്യങ്ങള്‍ തങ്ങളുടെ ആണവായുധങ്ങള്‍ നവീകരിക്കുന്നത് തുടരുന്നതായി സ്റ്റോക്ക്‌ഹോം ഇന്റര്‍നാഷണല്‍ പീസ് റിസര്‍ച്ച് ഇന്‍സ്റ്റിറ്റ്യൂട്ട് നടത്തിയ വിശകലനത്തില്‍ കണ്ടെത്തി.

അമേരിക്ക, റഷ്യ, ബ്രിട്ടന്‍, ഫ്രാന്‍സ്, ഉത്തര കൊറിയ, ഇസ്രായേല്‍ എന്നിവയാണ് റിപ്പോര്‍ട്ടില്‍ പരാമര്‍ശിച്ചിരിക്കുന്ന മറ്റ് രാജ്യങ്ങള്‍.

എല്ലാ ആണവായുധങ്ങളുടെയും 90 ശതമാനവും റഷ്യയും യുഎസും ചേര്‍ന്നാണെന്നും 2023 ല്‍ നിരവധി രാജ്യങ്ങള്‍ പുതിയ ആണവായുധ ശേഷിയുള്ള ആയുധ സംവിധാനങ്ങള്‍ വിന്യസിച്ചിട്ടുണ്ടെന്നും റിപ്പോര്‍ട്ട് പറയുന്നു.

2024 ജനുവരി വരെ ഇന്ത്യയില്‍ 172 ആണവ പോര്‍മുനകള്‍ സൂക്ഷിച്ചിട്ടുണ്ടെന്ന് റിപ്പോര്‍ട്ട് പറയുന്നു. ഇത് പാകിസ്ഥാനേക്കാള്‍ കൂടുതലാണ്. 2023-ല്‍ ഇന്ത്യ തങ്ങളുടെ ആണവായുധ ശേഖരം ചെറിയ തോതില്‍ വിപുലീകരിച്ചിരുന്നതായി റിപ്പോര്‍ട്ട് അവകാശപ്പെട്ടു.