ഡല്‍ഹിയില്‍ കനത്ത ചൂട്; എന്നിട്ടും അരവിന്ദ് കെജ്‌രിവാളിന് ജയിലില്‍ കൂളര്‍ നല്‍കുന്നില്ലെന്ന് അതിഷി

ന്യൂഡല്‍ഹി: ഡല്‍ഹിയില്‍ കനത്ത ചൂടായിട്ടും മുഖ്യമന്ത്രി അരവിന്ദ് കെജ്‌രിവാളിന് ജയിലില്‍ കൂളര്‍ നല്‍കുന്നില്ലെന്ന് മന്ത്രിയും എഎപി നേതാവുമായ അതിഷി ആരോപിച്ചു. എക്‌സൈസ് നയവുമായി ബന്ധപ്പെട്ട കള്ളപ്പണം വെളുപ്പിക്കൽ കേസിൽ സുപ്രീം കോടതി അനുവദിച്ച ഇടക്കാല ജാമ്യം ജൂൺ ഒന്നിന് അവസാനിച്ചതിനാൽ അരവിന്ദ് കെജ്‌രിവാൾ തിഹാർ ജയിലിൽ കീഴടങ്ങിയതിന് മണിക്കൂറുകൾക്ക് ശേഷമാണ് അതിഷി ഇക്കാര്യം ആരോപിച്ചത്.

അരവിന്ദ് കെജ്‌രിവാളിനെ ബിജെപി കള്ളക്കേസിൽ അറസ്റ്റ് ചെയ്തിരിക്കുകയാണെന്ന് അതിഷി പറഞ്ഞു. കൂളർ പോലും നൽകാത്ത സെല്ലിലാണ് കെജ്‌രിവാളിനെ പാർപ്പിച്ചിരിക്കുന്നതെന്നും മന്ത്രി പറഞ്ഞു. 

"ഡൽഹിയിലെ താപനില 48 ഡിഗ്രി സെൽഷ്യസിലും 50 ഡിഗ്രി സെൽഷ്യസിലും എത്തുമ്പോൾ തിഹാർ ജയിലിൽ കുപ്രസിദ്ധ കുറ്റവാളികൾക്ക് കൂളറുകൾ നൽകുന്നു, എന്നാൽ ദില്ലിയിലെ ജനപ്രിയ മുഖ്യമന്ത്രി അരവിന്ദ് കെജ്‌രിവാളിന് ഈ കൊടും ചൂടിൽ കൂളർ നൽകിയിട്ടില്ല," എന്നായിരുന്നു അതിഷിയുടെ വാക്കുകള്‍.