'പേപ്പര്‍ ലീക്ക് ഗവണ്‍മെന്റ്': യുജിസി-നെറ്റ് റദ്ദാക്കിയതിന് പിന്നാലെ മോദി സര്‍ക്കാരിനെ വിമര്‍ശിച്ച് കോണ്‍ഗ്രസ്, നരേന്ദ്ര മോദി എപ്പോഴാണ് 'നീറ്റ് പരീക്ഷാ ചര്‍ച്ച ' നടത്തുന്നതെന്ന് മല്ലികാര്‍ജുന്‍ ഖാര്‍ഗെ

ഡല്‍ഹി: യുജിസി-നെറ്റ് റദ്ദാക്കിയതിന് തൊട്ടുപിന്നാലെ മോദി സര്‍ക്കാരിനെ പേപ്പര്‍ ചോര്‍ച്ച സര്‍ക്കാര്‍ എന്ന് വിശേഷിപ്പിച്ച് കോണ്‍ഗ്രസ് രംഗത്ത്. ഇതിന്റെ ഉത്തരവാദിത്തം വിദ്യാഭ്യാസ മന്ത്രി ഏറ്റെടുക്കുമോ എന്നും കോണ്‍ഗ്രസ് ചോദിച്ചു.

മെഡിക്കല്‍ പ്രവേശന പരീക്ഷയായ നീറ്റിലെ ക്രമക്കേടുകളില്‍ സര്‍ക്കാരിനെ കടന്നാക്രമിച്ച കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെ, പ്രധാനമന്ത്രി നരേന്ദ്ര മോദി എപ്പോഴാണ് നീറ്റ് പരീക്ഷാ ചര്‍ച്ച നടത്തുകയെന്നും ചോദിച്ചു.

യുജിസി-നെറ്റ് റദ്ദാക്കാന്‍ വിദ്യാഭ്യാസ മന്ത്രാലയം ഉത്തരവിട്ടതിന് പിന്നാലെ കോണ്‍ഗ്രസ് നേതാവ് പ്രിയങ്ക ഗാന്ധി വധേരയും സര്‍ക്കാരിനെ വിമര്‍ശിച്ചു.

നരേന്ദ്ര മോദി നിങ്ങള്‍ പരീക്ഷകളെക്കുറിച്ച് ധാരാളം ചര്‍ച്ച ചെയ്യാറുണ്ട്, എന്നാല്‍ എപ്പോഴാണ് നിങ്ങള്‍ 'നീറ്റ് പരീക്ഷാ പേ ചര്‍ച്ച' നടത്തുന്നത്. യുജിസി-നെറ്റ് പരീക്ഷ റദ്ദാക്കിയത് ലക്ഷക്കണക്കിന് വിദ്യാര്‍ത്ഥികളുടെ അഭിനിവേശത്തിന്റെ വിജയമാണെന്നും ഖാര്‍ഗെ ട്വിറ്ററില്‍ കുറിച്ചു.

നീറ്റ് പരീക്ഷയില്‍ പേപ്പറൊന്നും ചോര്‍ന്നിട്ടില്ലെന്നാണ് കേന്ദ്ര വിദ്യാഭ്യാസ മന്ത്രി ആദ്യം പറഞ്ഞതെന്നും എന്നാല്‍ ബിഹാറിലും ഗുജറാത്തിലും ഹരിയാനയിലും വിദ്യാഭ്യാസ മാഫിയയെ പിടികൂടിയപ്പോഴാണ് അഴിമതി നടന്നിട്ടുണ്ടെന്ന് മന്ത്രി സമ്മതിക്കുന്നതെന്നും ഖാര്‍ഗെ പറഞ്ഞു.

മോദിജി, നീറ്റ് പരീക്ഷയില്‍ നിങ്ങളുടെ സര്‍ക്കാരിന്റെ കൃത്രിമത്വവും പേപ്പര്‍ ചോര്‍ച്ചയും തടയാനുള്ള ഉത്തരവാദിത്തം ഏറ്റെടുക്കുക ഖാര്‍ഗെ പറഞ്ഞു. യുവാക്കളുടെ ഭാവിയുമായി മോദി സര്‍ക്കാര്‍ കളിക്കുകയാണെന്ന് കോണ്‍ഗ്രസ് ആരോപിച്ചു.