രാഹുൽ ഗാന്ധിയുടെ 'വോട്ട് ചോരി' ആരോപണം; എസ്‌ഐടി അന്വേഷണം ആവശ്യപ്പെട്ടുള്ള ഹർജി തള്ളി സുപ്രീം കോടതി

ഡല്‍ഹി: കോണ്‍ഗ്രസ് നേതാവ് രാഹുല്‍ ഗാന്ധിയുടെ 'വോട്ട് ചോരി' ആരോപണം അന്വേഷിക്കാന്‍ പ്രത്യേക സംഘത്തെ രൂപീകരിക്കണമെന്ന ഹര്‍ജി സുപ്രീം കോടതി തള്ളി. 

ഹര്‍ജിക്കാരനായ രോഹിത് പാണ്ഡെയോട് തിരഞ്ഞെടുപ്പ് കമ്മീഷനെ സമീപിക്കാന്‍ ജസ്റ്റിസ് സൂര്യകാന്ത്, ജോയ്മല്യ ബാഗ്ചി എന്നിവരടങ്ങിയ ബെഞ്ച് നിര്‍ദേശിച്ചു.

'ഹര്‍ജിക്കാരന്റെ വാദം കേട്ടു. പൊതുതാല്‍പ്പര്യാര്‍ത്ഥം സമര്‍പ്പിച്ചതാണെന്ന് പറയപ്പെടുന്ന ഈ ഹര്‍ജി പരിഗണിക്കാന്‍ ആഗ്രഹിക്കുന്നില്ല. ഹര്‍ജിക്കാരന് തിരഞ്ഞെടുപ്പ് കമ്മീഷനെ സമീപിക്കാവുന്നതാണ്,' ബെഞ്ച് വ്യക്തമാക്കി. 

രാഹുല്‍ ഗാന്ധിയുടെ ആരോപണങ്ങള്‍ താന്‍ സ്ഥിരീകരിച്ചിട്ടുണ്ടെന്നും വോട്ടു കൊള്ളയുമായി ബന്ധപ്പെട്ട പ്രാഥമിക തെളിവുകള്‍ കണ്ടെത്തിയെന്നും അവകാശപ്പെട്ടാണ് ഹര്‍ജിക്കാരന്‍ കോടതിയെ സമീപിച്ചത്.