കയ്യിൽ കിട്ടുന്ന ശമ്പളം കൂടുമോ? നികുതി ഇളവുകളും സ്വർണവില തകർച്ചയും; ബജറ്റിൽ ഉറ്റുനോക്കി മധ്യവർഗ്ഗം

ഡല്‍ഹി: ബജറ്റ് ദിനത്തില്‍ രാജ്യത്തെ ഓരോ നികുതിദായകന്റെയും മനസ്സിലുള്ള ചോദ്യം ലളിതമാണ്: ധനമന്ത്രി മധ്യവര്‍ഗ്ഗത്തിന് കൂടുതല്‍ നികുതി ഇളവുകള്‍ നല്‍കുമോ? അതോ കഴിഞ്ഞ വര്‍ഷത്തെ വലിയ മാറ്റങ്ങള്‍ക്ക് ശേഷം ഇത്തവണ കാര്യമായ പ്രഖ്യാപനങ്ങള്‍ ഉണ്ടാകില്ലേ?

സെക്ഷന്‍ 87എ-യിലെ മാറ്റങ്ങള്‍ നിര്‍ണ്ണായകം ചര്‍ച്ചകളുടെയെല്ലാം കേന്ദ്രബിന്ദു ആദായനികുതി നിയമത്തിലെ 'സെക്ഷന്‍ 87A' ആണ്. പുതിയ നികുതി ഘടനയില്‍ 12 ലക്ഷം രൂപ വരെ വരുമാനമുള്ളവരെ നികുതിയില്‍ നിന്ന് ഒഴിവാക്കുന്നത് ഈ വകുപ്പാണ്. കേവലം നികുതി സ്ലാബുകള്‍ മാറ്റുന്നതിലുപരി, നികുതി കണക്കാക്കിയ ശേഷം റിബേറ്റ് നല്‍കി അത് ഇല്ലാതാക്കുന്ന രീതിയാണിത്.

12 ലക്ഷം രൂപ എന്ന പരിധി 15 ലക്ഷത്തിലേക്ക് ഉയര്‍ത്തുമോ എന്നാണ് ഏവരും ഉറ്റുനോക്കുന്നത്. എന്നാല്‍ ഇത് നടക്കാന്‍ സാധ്യത കുറവാണെന്ന് ചില സാമ്പത്തിക വിദഗ്ധര്‍ വിലയിരുത്തുന്നു. കഴിഞ്ഞ വര്‍ഷം വരുത്തിയ മാറ്റങ്ങള്‍ വഴി സര്‍ക്കാരിന് നേരിട്ടുള്ള നികുതി വരുമാനത്തില്‍ ഏകദേശം ഒരു ലക്ഷം കോടി രൂപയുടെ കുറവുണ്ടായിട്ടുണ്ട്. ധനക്കമ്മി കുറയ്ക്കാന്‍ ശ്രമിക്കുന്ന സര്‍ക്കാര്‍ വീണ്ടുമൊരു വലിയ ഇളവ് നല്‍കാന്‍ മടിച്ചേക്കും.

ശമ്പളക്കാര്‍ക്ക് ഏറ്റവും എളുപ്പത്തില്‍ ആശ്വാസം നല്‍കാന്‍ കഴിയുന്ന വഴി 'സ്റ്റാന്‍ഡേര്‍ഡ് ഡിഡക്ഷന്‍' വര്‍ദ്ധിപ്പിക്കുക എന്നതാണ്. രേഖകളൊന്നും സമര്‍പ്പിക്കാതെ തന്നെ ശമ്പളത്തില്‍ നിന്ന് കുറയ്ക്കാവുന്ന തുകയാണിത്.

പുതിയ നികുതി ഘടനയില്‍ നിലവില്‍ ഇത് 75,000 രൂപയാണ്. പഴയ ഘടനയില്‍ ഇത് 50,000 രൂപയാണ്. പുതിയ ഘടനയില്‍ ഇത് ഒരു ലക്ഷം രൂപയായി ഉയര്‍ത്തിയാല്‍ സങ്കീര്‍ണ്ണമായ മാറ്റങ്ങളില്ലാതെ തന്നെ ജനങ്ങളുടെ കയ്യില്‍ കൂടുതല്‍ പണം എത്തും.

സ്വര്‍ണ, വെള്ളി വിപണിയില്‍ വന്‍ തകര്‍ച്ച ബജറ്റിന് തൊട്ടുമുമ്പ് സ്വര്‍ണ, വെള്ളി വിപണിയില്‍ വന്‍ തകര്‍ച്ചയാണ് നേരിടുന്നത്. ആഗോള വിപണിയിലെ മാറ്റങ്ങളും ബജറ്റിലെ ഇറക്കുമതി തീരുവയെക്കുറിച്ചുള്ള അഭ്യൂഹങ്ങളുമാണ് ഇതിന് കാരണം.

സ്വര്‍ണം എംസിഎക്‌സില്‍ 10 ഗ്രാമിന് 13,711 രൂപ കുറഞ്ഞ് 1,38,634 രൂപയിലെത്തി. വെള്ളി ഒരു കിലോയ്ക്ക് 26,273 രൂപ കുറഞ്ഞ് 2,65,652 രൂപയിലെത്തി.

നിലവില്‍ സ്വര്‍ണത്തിന് 6% അടിസ്ഥാന ഇറക്കുമതി തീരുവയും 3% ജിഎസ്ടിയുമാണുള്ളത്. തീരുവ 4 ശതമാനമായി കുറച്ചാല്‍ ആഭ്യന്തര വിപണിയില്‍ വില വീണ്ടും കുറയും. ഇത് സ്വര്‍ണം വാങ്ങാന്‍ കാത്തിരിക്കുന്നവര്‍ക്ക് വലിയ അവസരമാകും. അതേസമയം, തീരുവ കൂട്ടിയാല്‍ അത് ജ്വല്ലറി വിപണിയെ ബാധിക്കും.