ബിഷ്‌കെക്ക്: കിർഗിസ്ഥാനിലെ ബിഷ്‌കെക്കിൽ വിദേശ വിദ്യാര്‍ത്ഥികള്‍ക്കെതിരെ ആക്രമണം തുടരുന്നു. ഇന്ത്യയിലെയും, പാകിസ്ഥാനിലെയും വിദ്യാര്‍ത്ഥികളാണ് തദ്ദേശീയരില്‍ നിന്ന് കൂടുതല്‍ ഭീഷണി നേരിടുന്നത്. വിദേശവിദ്യാര്‍ത്ഥികളെ, പ്രത്യേകിച്ചും ദക്ഷിണേഷ്യയിൽ നിന്നുള്ളവരെ ലക്ഷ്യമിട്ടുള്ള ആൾക്കൂട്ട ആക്രമണങ്ങളെ തുടര്‍ന്ന്‌ കിർഗിസ്ഥാനിൽ താമസിക്കുന്ന പൗരന്മാർക്ക് ഇന്ത്യയും പാകിസ്ഥാനും മുന്നറിയിപ്പ് നൽകിയിരുന്നു.
സ്ഥിതിഗതികൾ ഇപ്പോൾ ശാന്തമാണെന്ന് കിർഗിസ്ഥാനിലെ ഇന്ത്യൻ എംബസി അറിയിച്ചു. ഇന്ത്യന്‍ വിദ്യാര്‍ത്ഥികളുമായി എംബസി ബന്ധപ്പെടുന്നുണ്ട്. താമസസ്ഥലത്തു തന്നെ തുടരാനാണ് നിര്‍ദ്ദേശം. എംബസിയുമായി നിരന്തരം സമ്പർക്കം പുലർത്താൻ വിദേശകാര്യ മന്ത്രി എസ് ജയശങ്കറും വിദ്യാർത്ഥികൾക്ക് നിർദ്ദേശം നൽകി.
പ്രശ്‌നങ്ങളുടെ തുടക്കം
മെയ് 13ന് തദ്ദേശിയരായ വിദ്യാര്‍ത്ഥികളും, പാകിസ്ഥാന്‍, ഈജിപ്ത് എന്നിവിടങ്ങളിലെ വിദ്യാര്‍ത്ഥികളും തമ്മിലുണ്ടായ തര്‍ക്കമാണ് പ്രശ്‌നങ്ങളുടെ തുടക്കമെന്നാണ് റിപ്പോര്‍ട്ട്. പ്രശ്‌നത്തില്‍ ഏര്‍പ്പെട്ട വിദേശികളോട് ഉദ്യോഗസ്ഥര്‍ മൃദുസമീപനം പുലര്‍ത്തുന്നുവെന്ന് ആരോപിച്ച് തദ്ദേശീയര്‍ മെയ് 17 രാത്രി തെരുവിലിറങ്ങി. എന്നാൽ, മെയ് 13ന് നടന്ന സംഭവം അറിഞ്ഞയുടൻ മൂന്ന് വിദ്യാർത്ഥികളെ കസ്റ്റഡിയിലെടുത്തതായി പൊലീസ് വ്യക്തമാക്കി.
ഇന്ത്യ, പാകിസ്ഥാൻ, ബംഗ്ലാദേശ് എന്നിവിടങ്ങളിൽ നിന്നുള്ള അന്തർദേശീയ വിദ്യാർത്ഥികൾ താമസിക്കുന്ന മെഡിക്കൽ യൂണിവേഴ്സിറ്റി ഹോസ്റ്റലുകളെയാണ്‌ അക്രമാസക്തരായ ജനക്കൂട്ടം ലക്ഷ്യമിട്ടത്.നിലവിൽ കിർഗിസ്ഥാനിൽ 15,000ൽപരം ഇന്ത്യൻ വിദ്യാർഥികളാണ് പഠിക്കുന്നതെന്നാണ് റിപ്പോര്‍ട്ട്. സംഘര്‍ഷത്തില്‍ ചില പാക് വിദ്യാര്‍ത്ഥികള്‍ക്ക് പരിക്കേറ്റിരുന്നു.
സംഭവത്തിൽ ഉൾപ്പെട്ട സ്വദേശികളെയും വിദേശികളെയും കസ്റ്റഡിയിലെടുക്കാൻ നിയമപാലകർ ഉടൻ നടപടികൾ സ്വീകരിച്ചതായി കിർഗിസ്ഥാൻ വിദേശകാര്യ മന്ത്രാലയവും മെയ് 18 ന് ഒരു പ്രസ്താവന ഇറക്കിയിരുന്നു.
/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/59NXozzQY9SEKvPSqYSP.jpg)