ഇന്ത്യയുമായുള്ള ബന്ധത്തിന് ദോഷം വരുത്തുന്നു. 8.8 മില്യൺ രൂപയുടെ എച്ച്1-ബി വിസ ഫീസ് പിൻവലിക്കണമെന്ന് ആവശ്യപ്പെട്ട് ട്രംപിന് കത്തെഴുതി യുഎസ് നിയമനിർമ്മാതാക്കൾ

വാഷിംഗ്ടണ്‍: പുതിയ അപേക്ഷകള്‍ക്ക് 100,000 യുഎസ് ഡോളര്‍ (88 ലക്ഷം രൂപ) ഫീസ് ചുമത്തുന്ന എച്ച്1-ബി വിസ ഉത്തരവ് പുനഃപരിശോധിക്കണമെന്ന് യുഎസ് നിയമനിര്‍മ്മാതാക്കള്‍ പ്രസിഡന്റ് ഡൊണാള്‍ഡ് ട്രംപിനോട് ആവശ്യപ്പെട്ടു. 

വിവരസാങ്കേതികവിദ്യ, കൃത്രിമബുദ്ധി മേഖലകളില്‍ ഇന്ത്യന്‍ പൗരന്മാര്‍ അമേരിക്കയുടെ നേതൃത്വം ശക്തിപ്പെടുത്തുന്നുണ്ടെന്നും അത്തരം നിയന്ത്രണ നയങ്ങള്‍ യുഎസ്-ഇന്ത്യ ബന്ധങ്ങളെ പ്രതികൂലമായി ബാധിക്കുമെന്നും നിയമനിര്‍മ്മാതാക്കള്‍ പറയുന്നു.

യുഎസ് ജനപ്രതിനിധി സഭ അംഗം ജിമ്മി പനേറ്റ, കോണ്‍ഗ്രസ് വനിതകളായ അമി ബെറ, സലൂദ് കാര്‍ബജല്‍, ജൂലി ജോണ്‍സണ്‍ എന്നിവര്‍ ട്രംപിന് അയച്ച കത്തില്‍, ഉയര്‍ന്ന ഫീസ് പിന്‍വലിക്കണമെന്ന് ആവശ്യപ്പെട്ടു.

കുടിയേറ്റക്കാരല്ലാത്ത ചില തൊഴിലാളികളുടെ പ്രവേശനം നിരോധിക്കുകയും 100,000 യുഎസ് ഡോളര്‍ ഫീസ് ചുമത്തുകയും ചെയ്ത ട്രംപിന്റെ ഉത്തരവില്‍ നിയമനിര്‍മ്മാതാക്കള്‍ ആശങ്ക പ്രകടിപ്പിച്ചു.

യുഎസ് സമ്പദ്വ്യവസ്ഥയ്ക്കും ദേശീയ സുരക്ഷയ്ക്കും മത്സര നേട്ടത്തിനും ഇന്ത്യയുമായുള്ള യുഎസ് ബന്ധത്തിനും ഇന്ത്യന്‍-അമേരിക്കന്‍ സമൂഹത്തിനും എച്ച്1-ബി വിസ പ്രോഗ്രാം ഒരുപോലെ പ്രധാനമാണെന്ന് ട്രംപിന് അയച്ച കത്തില്‍ യുഎസ് നിയമനിര്‍മ്മാതാക്കള്‍ പറഞ്ഞു.

ഇന്ത്യയുമായുള്ള യുഎസിന്റെ തന്ത്രപരമായ പങ്കാളിത്തം ശക്തിപ്പെടുത്തുന്നതിന് ഈ പ്രതിഭയെ ആകര്‍ഷിക്കേണ്ടതിന്റെ ആവശ്യകത നിയമനിര്‍മ്മാതാക്കള്‍ ട്രംപിന്റെ ശ്രദ്ധയില്‍പ്പെടുത്തി.

സെപ്റ്റംബര്‍ 19 ന് ട്രംപ് നടത്തിയ പ്രഖ്യാപനം പുനഃപരിശോധിക്കണമെന്നും എച്ച്1-ബി പ്രോഗ്രാമിലേക്കുള്ള പ്രവേശനം നിയന്ത്രിക്കുന്ന ഒരു നയവും നടപ്പിലാക്കരുതെന്നും നിയമനിര്‍മ്മാതാക്കള്‍ ആവശ്യപ്പെട്ടു.