പെണ്‍കുട്ടിയെ വഴിയില്‍ തടഞ്ഞുനിര്‍ത്തി കാണാന്‍ ഭംഗിയുണ്ടെന്നു പറഞ്ഞ് ചുംബിച്ചു; പ്രതിക്ക് മൂന്നുവര്‍ഷം തടവ്

ചേര്‍ത്തല: പന്ത്രണ്ടു വയസുകാരിക്കുനേരേ ലൈംഗികാതിക്രമം നടത്തിയ കേസിലെ പ്രതിക്ക് മൂന്നുവര്‍ഷം തടവും അരലക്ഷം പിഴയും ശിക്ഷ വിധിച്ച് ചേര്‍ത്തല പ്രത്യേക അതിവേഗ കോടതി (പോക്സോ).

തൈക്കാട്ടുശേരി പഞ്ചായത്ത് ഒന്നാം വാര്‍ഡ് ചാത്തങ്കേരി വീട്ടില്‍ മധു (48)വിനെയാണ് ശിക്ഷിച്ചത്. പിഴയടയ്ക്കാത്ത പക്ഷം മൂന്നുമാസം കൂടി തടവ് അനുഭവിക്കണം. 

2023 ഏപ്രിലാണ് സംഭവം. വീടിനടുത്തുള്ള ക്ലബിന്റെ വാര്‍ഷികത്തോടനുബന്ധിച്ച് തിരുവാതിര കളിയില്‍ പങ്കെടുത്ത് അടുത്ത വീട്ടിലേക്കുപോയ പെണ്‍കുട്ടിയെ പ്രതി വഴിയില്‍വച്ച് കാണാന്‍ ഭംഗിയുണ്ടെന്നു പറഞ്ഞ് ചുംബിച്ചെന്നായിരുന്നു കേസ്. 

വിവരം പെണ്‍കുട്ടി അമ്മയോടു പറയുകയും തുടര്‍ന്ന് പൂച്ചാക്കല്‍ പോലീസില്‍ പരാതി നല്‍കുകയുമായിരുന്നു. പ്രോസിക്യൂഷന്‍ ഭാഗത്തുനിന്നു 15 സാക്ഷികളെയും 10 രേഖകളും ഹാജരാക്കി. 

പ്രോസിക്യൂഷനുവേണ്ടി സ്പെഷല്‍ പബ്ലിക് പ്രോസിക്യൂട്ടര്‍ അഡ്വ. ബീന കാര്‍ത്തികേയന്‍, അഡ്വ. വി.എല്‍. ഭാഗ്യലക്ഷ്മി എന്നിവര്‍ ഹാജരായി.