കോട്ടയം കുമാരനല്ലൂരില്‍ യുവതിയെ ഭര്‍ത്താവ് ക്രൂരമായി മര്‍ദിച്ചതായി പരാതി. അമ്മയെ മർദിക്കുന്നതു കണ്ട് പോലീസിനെ ബന്ധപ്പെട്ടത് മക്കൾ. പോലീസ് എത്തുമെന്നു കണ്ട ഭർത്താവ് ഒളിവിൽ പോയി. സ്ഥിരമായി താന്‍ മർദനത്തിനിരയാകുന്നുണ്ടെന്നു യുവതി

കോട്ടയം: കുമാരനല്ലൂരില്‍ യുവതിയെ ഭര്‍ത്താവ് ക്രൂരമായി മര്‍ദിച്ചെന്നു പരാതി. രമ്യ മോഹന്‍ എന്ന യുവതിക്കാണ് കുമാരനല്ലൂരിലെ ഭര്‍ത്താവിന്റെ വീട്ടില്‍വച്ചു മർദനമേറ്റത്. ഭര്‍ത്താവ് ജയന്‍ ഒളിവിലാണെന്നാണ് വിവരം.

യുവതിയുടെ മുഖത്തിന് ഗുരുതര പരുക്കുണ്ട്. രമ്യയെ കൊല്ലുമെന്നും ഇയാള്‍ ഭീഷണിപ്പെടുത്തിയിരുന്നു. മക്കളെയും ഇയാള്‍ മര്‍ദിക്കാറുണ്ടെന്നാണു വിവരം. രമ്യയുടെ മക്കളാണ് വിവരം പോലിസില്‍ വിളിച്ചു പറയുന്നത്. തുടര്‍ന്ന് പോലീസ് വീട്ടിലെത്തി യുവതിയെ ആശുപത്രിയിലെത്തിക്കുകയായിരുന്നു.

കുറെയധികം കാലമായി താന്‍ മർദനത്തിനിരയാകുന്നുണ്ടെന്നു യുവതി വെളിപ്പെടുത്തി. അതേസമയം, പോലിസ് എത്തിയപ്പോഴേക്കും ജയന്‍ കടന്നുകളഞ്ഞിരുന്നു. ഇയാൾക്കായി ഗാന്ധിനഗർ പോലീസ് അന്വേഷണം ആരംഭിച്ചു.