രാഹുൽ മാങ്കൂട്ടത്തിൽ തിരുവനന്തപുരത്തെത്തി. വഞ്ചിയൂരിൽ നേരിട്ടെത്തി വക്കാലത്ത് ഒപ്പിട്ടശേഷം വീണ്ടും ഒളിവിൽ. ഒളിതാവളം തിരഞ്ഞ് പോലീസ്

തിരുവനന്തപുരം: ലൈംഗിക പീഡന കേസിൽ പോലീസ് എഫ്ഐആർ രജിസ്റ്റർ ചെയ്തതിനു മണിക്കൂറുകൾക്കകം തന്നെ പ്രതി രാഹുൽ മാങ്കൂട്ടത്തിൽ തിരുവനന്തപുരത്ത് എത്തിയതായി സൂചന. വഞ്ചിയൂരിലെ ഒരു വക്കീൽ ഓഫീസിൽ എത്തി വക്കാലത്ത് ഒപ്പിട്ട ശേഷം വീണ്ടും ഒളിവിൽ പോയെന്നാണ് വിവരം.

പോലീസിന് ലഭിച്ച സൂചനപ്രകാരം രാഹുൽ ഇപ്പോഴും തിരുവനന്തപുരത്തോ സമീപ പ്രദേശങ്ങളിലോ തന്നെ ഒളിവിൽ കഴിഞ്ഞുവരികയാണ്. രാഹുലിനെതിരെ വെള്ളിയാഴ്ച ലുക്ക്ഔട്ട് നോട്ടീസ് പുറത്തിറക്കുകയും വിമാനത്താവളങ്ങൾക്കും ബ്യൂറോ ഓഫ് ഇമിഗ്രേഷനും അറിയിപ്പുകൾ നൽകുകയും ചെയ്തിരുന്നു.

അതേസമയം, പരാതിക്കാരിയുടെ മൊഴിയിൽ രാഹുലുമായുള്ള പരിചയം ആദ്യ വിവാഹബന്ധം ഒഴിഞ്ഞതിന് അഞ്ചു മാസം ശേഷമാണ് ആരംഭിച്ചതെന്ന് പറയുന്നു. 2025 മാർച്ച് 4ന് അതിജീവിതയുടെ തൃക്കണ്ണാപുരം ഫ്ലാറ്റിൽ ദേഹോപദ്രവം ഉൾപ്പെടെ പീഡിപ്പിച്ചതായി എഫ്ഐആർ ചൂണ്ടിക്കാട്ടുന്നു.

മാർച്ച് 17ന് ഭീഷണിപ്പെടുത്തി നഗ്നദൃശ്യങ്ങൾ പകർ‍ത്തിയതടക്കം, അതിജീവിത ഗർഭിണിയാണെന്ന് അറിഞ്ഞിട്ടും ഏപ്രിൽ 22ന് തൃക്കണ്ണാപുരത്ത്, മേയ് അവസാനം പാലക്കാട് തുടങ്ങി വിവിധ ഇടങ്ങളിൽ പീഡനം തുടർന്നുവെന്നാണ് പോലീസ് രേഖപ്പെടുത്തിയിരിക്കുന്നത്.