ഇന്ന് ഓഗസ്റ്റ് 3: ദേശീയ ഹൃദയം മാറ്റിവെയ്ക്കല്‍ ദിനവും ചിന്മയാനന്ദ സമാധി ദിനവും ഇന്ന്: അനൂപ് മേനോന്റെയും അനു ആഗയുടെയും നാദിയ അലിയുടെയും ജന്മദിനം: ഇംഗ്ലീഷ് പര്യവേഷകനായിരുന്ന ജോണ്‍സ് സ്പെക് നൈല്‍ നദിയുടെ ഉത്ഭവസ്ഥാനമായ വിക്ടോറിയ തടാകം കണ്ടെത്തിയതും അഡോള്‍ഫ് ഹിറ്റ്ലര്‍ പ്രസിഡന്റ്, ചാന്‍സലര്‍ എന്നീ സ്ഥാനങ്ങള്‍ ഫ്യൂ:റര്‍ എന്ന ഒറ്റ സ്ഥാനത്തില്‍ ലയിപ്പിച്ചുകൊണ്ട് ജര്‍മനിയുടെ പരമാധികാരിയായി സ്ഥാനമേല്‍ക്കുന്നതും ചരിത്രത്തില്‍ ഇതെ ദിനം തന്നെ: ജ്യോതിര്‍ഗമയ വര്‍ത്തമാനവും

1198   കർക്കടകം 18
അവിട്ടം / ദ്വിതീയ
2023  ആഗസ്റ്റ് 3,വ്യാഴം

ഇന്ന് ; 
     ദേശീയ ഹൃദയംമാറ്റിവെയ്ക്കൽ ദിനം !
          ***********
.    

             ചിന്മയാനന്ദ സമാധി ദിനം !
              **********
  <ആത്മീയം, വിദ്യാഭ്യാസം, ജീവകാരുണ്യം എന്നീ രംഗങ്ങളില്‍ മുംബൈ കേന്ദ്രമാക്കി പ്രവര്‍ത്തിക്കുന്ന ചിന്മയ ഫൌണ്ടേഷന്റെ സ്ഥാപകൻ സ്വാമി ചിന്മയാനന്ദയുടെ സമാധി ദിനം! >

* ഇക്വറ്റോറിയൽ ഗിനിയ-: സൈനിക ദിനം !
* കെന്റക്കി-: തണ്ണിമത്തൻ ദിനം !
* വെനിസ്വേല-: നാഷണൽ ഗാർഡ് ഡേ !
*നിഗർ-: സ്വാതന്ത്ര്യ ദിനം!
< ഈ ദിനം ഓരോ നിഗരീയനും ഒരു ചെടി നട്ടു ആർബർ ദിനമായി കൊണ്ടാടുന്നു.>

         Cloves Syndrome Awareness Day !
                    *********
< Cloves Syndrome, a disorder that causes overgrowth and often vascular issues.>

                    തണ്ണിമത്തൻ ദിനം !
                  ********
                     (Watermelon Day)
 
*India Pale Ale Day      
* Clean Your Floors Day
* National Georgia Day
* National Grab Some Nuts Day

            ഇന്നത്തെ മൊഴിമുത്ത്
           ്‌്‌്‌്‌്‌്‌്‌്‌്‌്‌്‌്‌്‌്‌്‌്‌്‌്‌്‌്‌്‌്

"എല്ലാവരും അവരുടെ അഹന്തയുടെ തടവറയിൽ ഉറങ്ങിടുമ്പോൾ, ഇന്ദ്രിയങ്ങളെല്ലാം നിദ്രയിൽ ആഴ്ന്നിടുമ്പോൾ, ധ്യാനത്തിൽ മുന്നിലേക്ക് നിഗൂഢമായ പ്രകാശം തെളിയുമ്പോൾ  ഇരുട്ടിൽ വൃന്ദാവനത്തിലെ നീലശ്യാമള വർണ്ണൻ  ജനിക്കുന്നു."

.                <- സ്വാമി ചിന്മയാനന്ദ  >
            **********

മലയാള സിനിമയിലെ മുൻനിരയിലെ ചലച്ചിത്രനടനും, തിരക്കഥാകൃത്തുമായ   അനൂപ്  ഗംഗാധരൻ എന്ന അനൂപ് മേനോന്റെയും (1977),

തെർ മാക്സ് കമ്പനിയുടെ മുൻ ചെയർപേഴ്സനും മുൻ രാജ്യസഭ അംഗവും  സാമൂഹിക പ്രവർത്തകയുമായ അനു ആഗയുടെയും( 1942),

പല പ്രാവശ്യം ഇൻറ്റർ നാഷണൽ ഡാൻസ് മ്യൂസിക്കി അവാർഡ് കിട്ടിയിട്ടുള്ള  പാക്കിസ്താനി- അമേരിക്കൻ ഗായികയും- ഗാനരചയിതാവുമായ നാദിയ അലിയുടെയും (1980),

അന്താരാഷ്ട്ര ബോഡിബിൽഡർ ആയ അമേരിക്കക്കാരൻ ജെയ് കട്ലറിന്റെയും  (1973),

ഒരു അമേരിക്കൻ മുൻ ഫുട്ബോൾ ക്വാർട്ടർബാക്കായ തോമസ് എഡ്വേർഡ് പാട്രിക് ബ്രാഡി  ജൂനിയറിൻ്റേയും (1977),

എൻബിസി പരമ്പരയായ ദി വെസ്റ്റ് വിംഗിൽ (1999-2006) യുഎസ് പ്രസിഡന്റ് ജോസിയ ബാർട്ട്‌ലെറ്റ് എന്ന കഥാപാത്രത്തിലൂടെ പ്രശസ്തനായ ഷീൻ അറിയപ്പെടുന്ന, ആറ് പതിറ്റാണ്ട് നീണ്ട കരിയറിൽ മൂന്ന് എമ്മി അവാർഡുകൾ , ഗോൾഡൻ ഗ്ലോബ് അവാർഡ് , നാല് സ്‌ക്രീൻ ആക്ടേഴ്‌സ് ഗിൽഡ് അവാർഡ് എന്നിവയുൾപ്പെടെ നിരവധി അംഗീകാരങ്ങൾ  ലഭിച്ചമാർട്ടിൻ ഷീൻ എന്നറിയപ്പെടുന്ന റാമോൺ അന്റോണിയോ ജെറാർഡോ എസ്റ്റെവസിൻ്റെയും (1940) ജന്മദിനം !

ഇന്നത്തെ സ്മരണ !!!
********

വി. രാമകൃഷ്ണപിള്ള മ. (1913-1971)
സ്വാമി ചിന്മയാനന്ദ മ. (1916-1993) 
ആർ. രാമചന്ദ്രൻ മ. (1923-2005)
കാവാലം വിശ്വനാഥക്കുറുപ്പ് മ. (1829-2006)
മിഷേൽ അഡൻസൺ മ. (1727-1806)
ജോർജ് ഇന്നസ് മ. (1825 -1894)
എഡ്വേർഡ്  ടിച്ച്നർ മ. (1867-1927)
സൈനബുൽ ഗസ്സാലി മ. (1917- 2005)
അലക്സാണ്ടർ സോൾഷെനിറ്റ്സിൻ മ. (1918 -2008)

ശേഷഗിരി പ്രഭു ജ. (1855 -1924)
എൻ.കെ. ദാമോദരൻ ജ. (1909 -1996)
ഡോ. എസ്. പിനകപാണി ജ. (1913-2013)
മൈഥിലി ശരൺ ഗുപ്ത ജ. 1885-1964)
പി.ഡി. ജെയിംസ് ജ. (1920-2014)
ഉത്‌പൽ കുമാർ ബസു ജ. (1939 -2015),
ആർച്ച്ഡേൽ വിൽസൻ ജ. (1803-1874)
ഓഹി കാർച്യേ ബഹ്സണ്   ജ. (1908-2004)
്്്്്്്്്്്്്്്്്്്്്‌്‌്‌്‌്‌്‌്‌

ഇന്ന്‍ ,

 ഒന്നാം കേരളനിയമസഭയിൽ ഹരിപ്പാട് നിയോജക മണ്ഡലത്തെ പ്രതിനിധീകരിച്ച  രാഷ്ട്രീയ നേതാവും,   തിരുവിതാംകൂർ ദേവസ്വം ബോർഡംഗവും, കലാസാംസകാരിക പ്രവർത്തനങ്ങളിൽ സജീവ സാനിധ്യമായിരുന്ന വി. രാമകൃഷ്ണപിള്ളയെയും (1913 - 3 ആഗസ്റ്റ് 1971),

ഫ്രീപ്രസ്സ് ജേണൽ, നാഷണൽ ഹൊറാൾഡ് എന്നീ പത്രങ്ങളിൽ ജോലി ചെയ്യുകയും ക്വിറ്റ് ഇന്ത്യാ    സമരത്തിൽ പങ്കെടുത്ത് അറസ്റ്റ് വരിക്കുകയും പിന്നിട് ഹൃഷികേശിലെത്തി സ്വാമി .ശിവാനന്ദയുടെ ശിഷ്യനായി ദീക്ഷ സ്വീകരിക്കുകയും വേദാന്തത്തിന്റെ പ്രചാരണത്തിനായി  ഇന്ത്യയിലൊട്ടാകെ 300 ഓളം ശാഖകളുമായി വ്യാപിച്ചു കിടക്കുന്ന ചിന്മയാ മിഷൻ സ്ഥാപിക്കുകയും ചെയ്ത ബാലകൃഷ്ണ മേനോൻ (ബാലൻ) എന്ന സ്വാമി   ചിന്മയാനന്ദയെയും (മെയ് 8 1916-ഓഗസ്റ്റ് 3 1993) ,

വളരെക്കുറച്ചു കവിതകൾ മാത്രമേ എഴുതിയിട്ടുള്ളു എങ്കിലും തന്റേതായ ഒരു ചാലു കീറി അതിനെ ആസ്വാദക ഹൃദയങ്ങളിലേക്ക് നയിച്ച് അവിടങ്ങളിൽ നനവുണ്ടാക്കുകയും, പാബ്ലോ നെരൂദയുടെ കൃതികൾ മലയാളത്തിലേക്ക് വിവർത്തനം ചെയ്യുകയും, ചെയ്ത മലയാള കവി ആർ. രാമചന്ദ്രനെയും (1923 - ഓഗസ്റ്റ് 3 2005).

കുട്ടനാട്ടിലെ നാടന് പാട്ടുകളുടെ സമാഹാരത്തില് കവിതയിലും നാടകത്തിലും  കുട്ടനാടന്‍ ഭൂമികയുടെ പരുക്കന്‍ യാഥാര്‍ഥ്യങ്ങള്‍ പകര്‍ത്തിയ കാവാലം വിശ്വനാഥ ക്കുറുപ്പിനെയും (1929-2006 ഓഗസ്റ്റ്‌ 3 ),

സ്കോട് ലാൻഡ് വംശജനായ ഫ്രഞ്ച് പ്രകൃതിശാസ്ത്രജ്ഞൻ ആയിരുന്ന മിഷേൽ അഡൻസണിനെയും (7 April 1727 – 3 August 1806),

അമേരിക്കൻ വൻകരയുടെ ഭൂദൃശ്യചിത്രങ്ങളുളും, ഭൂമിശാസ്ത്രപരമായ ചിത്രങ്ങളും വസ്തുനിഷ്ഠമായും സ്പഷ്ടമായും വരയ്ക്കുമായിരുന്ന യു.എസ്. ചിത്രകാരനായ ജോർജ് ഇന്നസിനെയും (1825 മെയ്. 1-1894 ഓഗസ്റ്റ് 3),

ഇന്ദ്രിയാനുഭവങ്ങളുടെ സവിശേഷ സ്വഭാവത്തെ ആസ്പദമാക്കി വ്യക്തിയുടെ വികാരവിചാരങ്ങളെ വിശകലനം ചെയ്യാൻ കഴിയുമെന്ന സിദ്ധാന്തവും ,  വ്യക്തിയുടെ അനുഭവങ്ങളെ വിശകലനം ചെയ്യാൻ നാഡീവ്യൂഹത്തെക്കുറിച്ചുള്ള അറിവ് അനുപേക്ഷണീയമാണെന്നു, വാദിച്ച  ബ്രിട്ടീഷ്-അമേരിക്കൻ മനഃശാസ്ത്രജ്ഞൻ എഡ്വേർഡ് ബ്രാഡ്ഫോർഡ് ടിച്ച്നറെയും (1867 ജനുവരി 11-1927 ആഗസ്റ്റ് 3),

ഈജിപ്ഷ്യൻ, സാമൂഹിക പ്രവർത്തകയും ,  മുസ്‌ലിം ബ്രദർഹുഡ് എന്ന സംഘടനയുടെ വനിതാവിഭാഗമായ മുസ്ലിം വുമൺസ് അസോസിയേഷന്റെ സ്ഥാപകയും, മലയാളത്തിലടക്കം നിരവധി ഭാഷയിലേക്ക്  വിവർത്തനം ചെയ്യപ്പെട്ട "ജയിലനുഭവങ്ങൾ" എന്ന പേരില്‍ ഒരു ഗ്രന്ഥം രചിക്കുകയും ചെയ്ത  സൈനബുൽ ഗസ്സാലിയെയും (ജനുവരി 2,1917-ആഗസ്റ്റ് 3, 2005),

ഇവാൻ ഡെനിസോവിച്ചിന്റെ ജീവിതത്തിലെ ഒരു ദിവസം, ഗുലാഗ് ദ്വീപസമൂഹം എന്നീ നോവലുകളിലൂടെ സ്റ്റാലിന്റെ കാലത്തെ സോവിയറ്റ് യൂണിയനിലെ തടവറകളുടെ കഥ പറഞ്ഞ്  പ്രശസ്തനായ റഷ്യൻ നോവലിസ്റ്റും നോബൽ സമ്മാനജേതാവുമായ അലക്സാണ്ടർ സോൾഷെനിറ്റ്സിനിനെയും (ഡിസംബർ 11, 1918 - ഓഗസ്റ്റ് 3, 2008),

കൊങ്കണിയായിരുന്നു  മാതൃഭാഷ യെങ്കിലും മലയാളഭാഷയിലും വ്യാകരണത്തിലും  അതീവ തത്പരനും വ്യാകരണപഠനം കുട്ടികൾക്ക് ലളിതമായി പറഞ്ഞുകൊടുക്കാനും മനസ്സിലാക്കാനും ഉതകുന്ന തരത്തിൽ 'വ്യാകരണമിത്രം' എന്ന മലയാള വ്യാകരണ ഗ്രന്ഥം  രചിച്ച പ്രമുഖ  വ്യാകരണപണ്ഡിതരിൽ ഒരാളായ ശേഷഗിരി പ്രഭു എന്നറിയപ്പെടുന്ന മാധവ ശേഷഗിരി പ്രഭുവിനെയും ( 1855 ഓഗസ്റ്റ് 3-മെയ് 24, 1924),

സ്കൂൾ അധ്യാപകൻ, ഇൻഷ്വുറൻസ് കമ്പനിയിൽ പ്രസിഡന്റ്, ധനകാര്യ വകുപ്പിൽ അക്കൗണ്ട്സ് ഓഫീസർ,  സാഹിത്യപ്രവർത്തക സഹകരണ സംഘത്തിൽ റീഡർ, സർവവിജ്ഞാന കോശ ഇൻസ്റ്റിറ്റ്യൂട്ടിൽ സബ് എഡിറ്റർ, കലാകൗമുദി വാരികയിൽ പത്രാധിപസമിതി അംഗം,  തോന്നയ്ക്കൽ ആശാൻ സ്മാരക സമിതി അധ്യക്ഷൻ, ആശാൻ അക്കാദമിയുടെ സെക്രട്ടറി, എസ്.എൻ. കൾച്ചറൽ സൊസൈറ്റി ഉപദേശകസമിതി അംഗം,  മൂലൂർ ജന്മശതാബ്ദി ആഘോഷ പരിപാടിയുടെ സൂത്രധാരൻ എന്നി നിലകളിൽ പ്രവർത്തിക്കുകയും കവിത, ഉപന്യാസം, വിവർത്തനം, എഡിറ്റിങ് എന്നീ വിവിധ മേഖലകളിലായി നിരവധി സംഭാവനകൾ  നൽകുകയും ചെയ്ത  പ്രമുഖ മലയാള സാഹിത്യകാരൻ എൻ.കെ. ദാമോദരനെയും (1909 ആഗസ്റ്റ് 3- ജൂലൈ 25, 1996)

വിശാഖപട്ടണം ആന്ധ്ര മെഡിക്കൽ കോളജിലും അസി. പ്രഫസറും  കുർണൂൽ മെഡിക്കൽ കോളജിൽ  പ്രഫസർ ഓഫ് മെഡിസിനും, സംഗീതാലാപനത്തിൽ സ്വന്തമായ ശൈലി രൂപപ്പെടുത്തുകയും  ചെയ്ത പ്രശസ്ത കർണാടക സംഗീതജ്ഞനായിരുന്ന ഡോ. എസ്. പിനകപാണി എന്ന ഡോ. ശ്രീപാദ പിനകപാണിയെയും  (3 ആഗസ്റ്റ് 1913 - 11 മാർച്ച് 2013)

പിയ മന ഭാവെ എന്ന കാവ്യസമാഹാരമടക്കം നിരവധി കൃതികൾ രചിച്ച ബംഗാളി സാഹിത്യകാരനും അദ്ധ്യാപകനുമായ ഉത്‌പൽ കുമാർ ബസുവിനെയും ( 3 ആഗസ്റ്റ് 1939 - 3 ഒക്റ്റോബർ 2015),

1857-ലെ ലഹളക്കാലത്തെ ദില്ലി പിടിച്ചടക്കൽ പദ്ധതിയിൽ ബ്രിട്ടീഷ് സേനയുടെ നേതൃസ്ഥാനം വഹിക്കുകയും, ലഹളയുടെ ഭാഗമായി 1858 മാർച്ചിൽ നടന്ന ലക്നൗ പിടിച്ചടക്കൽ ദൗത്യത്തിലും പ്രധാനസ്ഥാനം വഹിക്കുകയും ചെയ്ത ബ്രിട്ടീഷ് ഇന്ത്യയിലെ ഒരു പ്രശസ്ത സൈനികനായിരുന്ന ആർച്ച്ഡേൽ വിൽസനെയും (ഇംഗ്ലീഷ്: Archdale Wilson, 1803 ഓഗസ്റ്റ് 3 - 1874 മേയ് 9),

ഫ്രഞ്ച് ഛായാഗ്രാഹകനും ആധുനിക ഫോട്ടോജേർണലിസത്തിന്റെ പിതാവ് എന്നു വിശേഷിപ്പിയ്ക്ക പ്പെടുന്നയാളുമായ ഓഹി കാർച്യേ ബഹ്സണിനെയും (ഓഗസ്റ്റ് 22, 1908 – ഓഗസ്റ്റ് 3, 2004)

ആസ്റ്റ്രേലിയയ്ക്ക് ഒരു ഏകീകൃത ഭരണം നേടിയെടുക്കുന്നതിനു വേണ്ടിയുള്ള പ്രവർത്തനങ്ങളിലൂടെ ശ്രദ്ധേയനാകുകയും, 1903 മുതൽ 10 വരെ  പ്രധാനമന്ത്രിയായ പ്രമുഖനായ രാഷ്ട്രീയ പ്രവർത്തകനായിരുന്ന ആൽഫ്രഡ് ഡീക്കിനെയും(3 ആഗസ്റ്റ് 1856 – 7 ഒക്ടോബർ 1919),

ദശലക്ഷം കോപ്പികൾ ലോകത്തെമ്പാടുമായി വിറ്റഴിഞ്ഞ കുറ്റാന്വേഷണ നോവലുകളുടെ രചനയിലൂടെ പ്രശസ്തയായ പി.ഡി. ജെയിംസ് എന്ന പേരിലെഴുതിയ ഫില്ലിസ് ഡൊറോത്തി ജെയിംസിനെയും(3 ഓഗസ്റ്റ് 1920 – 27 നവംബർ 2014),

ഇസ്രായലിലേക്കുള്ള ജൂതന്മാരുടെ ' പലായനത്തെ കുറിച്ച് എഴുതിയ എക്സോഡസ് എന്ന നോവൽ അടക്കം പല നല്ല ഇഗ്ലീഷ് നോവലുകളും എഴുതിയ അമേരിക്കൻ സാഹിത്യകാരൻ ലിയോൺ മാർക്കസ് ഉറിസിനെയും(ഓഗസ്റ്റ് 3 1924-ജൂൺ 21, 2003)

ഹിന്ദിയിലെ ആധുനിക കവികളിൽ പ്രശസ്തനും ഒരു സ്വാതന്ത്ര്യ സമരസേനാനിയുമായിരുന്ന മൈഥിലി ശരൺ ഗുപ്ത (3 ആഗസ്റ്റ് 1885-12 ഡിസംബർ 1964)യുടേയും,
ഓർമ്മിക്കാം.

ചരിത്രത്തിൽ ഇന്ന്…
*********

1492 - ക്രിസ്റ്റഫർ കൊളംബസ്   സ്പെയിനിലെ Palos de la Frontera  യിൽനിന്ന് യാത്ര തിരിക്കുന്നു.

1858 - ഇംഗ്ലീഷ് പര്യവേഷകനായിരുന്ന ജോൺസ് സ്പെക് നൈൽ നദിയുടെ ഉത്ഭവസ്ഥാനമായ വിക്ടോറിയ തടാകം കണ്ടെത്തി.

1914 - ഒന്നാം ലോകമഹായുദ്ധം:  ജർമനി ഫ്രാൻസിനോട് യുദ്ധം പ്രഖ്യാപിക്കുന്നു.

1934 - അഡോൾഫ് ഹിറ്റ്ലർ പ്രസിഡന്റ്, ചാൻസലർ എന്നീ സ്ഥാനങ്ങൾ ഫ്യൂ:റർഎ ന്ന ഒറ്റ സ്ഥാനത്തിൽ ലയിപ്പിച്ചുകൊണ്ട്  ജർമനിയുടെ പരമാധികാരിയായി സ്ഥാനമേൽക്കുന്നു.

1949 - അമേരിക്കയിൽ NBA (National Basketball Association) സ്ഥാപിക്കപ്പെട്ടു.

1958 - അമേരിക്കൻ ആണവ അന്തർവാഹിനി യു.എസ്.എസ്. നോട്ടിലസ് ആർട്ടിക്ക് മഞ്ഞുപാളികൾക്കടിയിലൂടെ  സഞ്ചരിക്കുന്നു.

1960 - നൈജർ ഫ്രാൻസിൽ നിന്ന്  സ്വാതന്ത്ര്യം പ്രാപിക്കുന്നു.

1994 - ഇന്ത്യയിലെ ആദ്യത്തെ ഹൃദയം മാറ്റിവയ്ക്കൽ ശസ്ത്രക്രിയ ഡൽഹിയിൽ ഡോ. പി വേണുഗോപാലിന്റെ നേതൃത്വത്തിൽ നടന്നു. 

2016 - ജി.എസ്.ടി ബിൽ രാജ്യസഭ പാസാക്കി. 

2018 - കിഴക്കൻ അഫ്ഗാനിസ്ഥാനിലെ ഷിയ പള്ളിക്ക് നേരെ നടന്ന ചാവേർ ആക്രമണത്തിൽ 29 പേർ കൊല്ലപ്പെടുകയും  80 ലധികം പേർക്ക് പരിക്കേൽക്കുകയും ചെയ്തു.

2020 - അന്താരാഷ്‌ട്ര ബഹിരാകാശ നിലയത്തിൽ നിന്ന് അമേരിക്കൻ ബഹിരാകാശ സഞ്ചാരികളായ ഡഗ് ഹർലി,  ബോബ് ബെൻകൻ എന്നിവരുമായി സ്പേസ് എക്‌സ് കമ്പനിയുടെ ക്രൂഡ്രാഗൺ പേടകം ഭൂമിയിലേക്ക് മടങ്ങിയെത്തി.

.      By ' ടീം തത്ത്വമസി - ജ്യോതിർഗ്ഗമയ '