തന്റെ മകനായ രാഹുൽ ഗാന്ധിക്ക് ഭീഷണിയാകില്ല എന്നതു കൊണ്ടാണ് സോണിയ മൻമോഹൻ സിംഗിനെ പ്രധാനമന്ത്രിയാക്കിയത്; ഒബാമ

ഡല്‍ഹി :ബരാക് ഒബാമയുടെ ഓർമ്മക്കുറിപ്പായ 'എ പ്രോമിസ്ഡ് ലാൻഡ്' ലോകമെമ്പാടും ഒരു കൊടുങ്കാറ്റുപോലെയടിക്കുകയാണ്. ലോകനേതാക്കളെക്കുറിച്ച് ഒബാമയുടെ വിലയിരുത്തല്‍ ഉൾപ്പെടുന്ന പുസ്തകത്തിൽ കോൺഗ്രസ് നേതാക്കളായ മൻമോഹൻ സിങ്ങിനെയും രാഹുൽ ഗാന്ധിയെയും കുറിച്ചുള്ള പരാമർശങ്ങൾ സജീവ ചർച്ചയായിരുന്നു.

ഇതേ പുസ്തകത്തില്‍ ഒബാമയുടെ മറ്റൊരു നിരീക്ഷണവും വാര്‍ത്തകളില്‍ നിറയുകയാണ്. കോണ്‍ഗ്രസ് അദ്ധ്യക്ഷ സോണിയ ഗാന്ധി എന്തുകൊണ്ട് പ്രധാനമന്ത്രിയായി മന്‍മോഹന്‍ സിംഗിനെ തിരഞ്ഞെടുത്തു എന്നതാണ് രാഷ്ട്രീയ നിരീക്ഷകരുടെ അഭിപ്രായങ്ങള്‍ കൂടി പരിഗണിച്ച്കൊണ്ട് ഒബാമ പുസ്തകത്തില്‍ പരാമര്‍ശിക്കുന്നത്.

തന്റെ മകൻ രാഹുൽ ഗാന്ധിക്ക് ഭീഷണിയാകില്ല എന്നതുകൊണ്ടാണ്, സോണിയ ഗാന്ധി മൻമോഹൻ സിംഗിനെ പ്രധാനമന്ത്രിയാക്കിയതെന്ന് ബരാക് ഒബാമ തന്റെ പുസ്തകത്തിൽ പറഞ്ഞിട്ടുണ്ട് .

'ഒന്നില്‍ കൂടുതല്‍ രാഷ്ട്രീയ നിരീക്ഷകര്‍‍ വിശ്വസിക്കുന്നു സോണിയ ഗാന്ധി പ്രത്യേകമായി ദേശീയ രാഷ്ട്രീയത്തില്‍ കാര്യമായ അടിത്തറയില്ലാത്ത ഈ മുതിര്‍ന്ന സിഖുകാരനെ പ്രധാനമന്ത്രിയായി തിരഞ്ഞെടുത്തത്, കോണ്‍ഗ്രസ് പാര്‍ട്ടിയുടെ നേതൃത്വം ഏറ്റെടുക്കാന്‍ അവര്‍ പ്രാപ്തനാക്കി കൊണ്ടുവരുന്ന മകന്‍ രാഹുലിന് ഭീഷണിയാകില്ല എന്നത് കൊണ്ടാണ് '- ഒബാമയുടെ ബുക്കില്‍ പറയുന്നു.

അമേരിക്കൻ പ്രസിഡന്റായിരുന്ന 2008-12 കാലത്തെക്കുറിച്ചാണ് അദ്ദേഹം പുസ്തകത്തിലൂടെ വിവരിക്കുന്നത്. 2010 ൽ ഇന്ത്യ സന്ദർശിച്ചതിനെക്കുറിച്ചും ഒബാമ പറയുന്നു. ആ കാലയളവിൽ മൻമോഹൻ സിംഗായിരുന്നു പ്രധാനമന്ത്രി.ഇന്ത്യൻ സമ്പദ് വ്യവസ്ഥയുടെ നവീകരണത്തിന് വഹിച്ച മൻമോഹൻ സിംഗിന്റെ പങ്കിനെക്കുറിച്ചും, 1990 കളിൽ ഇന്ത്യയുടെ ധനമന്ത്രിയായിരുന്ന അദ്ദേഹം ദശലക്ഷക്കണക്കിന് ആളുകളെ ദാരിദ്ര്യത്തിൽ നിന്ന് കരകയറ്റാൻ സഹായിച്ചെന്നും മുൻ യുഎസ് പ്രസിഡന്റ് പറയുന്നു.

മൻമോഹൻ സിംഗിന്റെ മതേതര നിലപാടുകളെക്കുറിച്ചും ഒബാമ പുസ്തകത്തിൽ പറയുന്നു. വിദേശനയങ്ങളിൽ ഏറെ ജാഗ്രത പുലർത്തിയിരുന്ന വ്യക്തിയായിരുന്നു സിംഗ് എന്നും ഒബാമ പുസ്തകത്തിൽ പറയുന്നു. കോൺഗ്രസ് നേതാവ് രാഹുൽ ഗാന്ധിയെക്കുറിച്ചുള്ള ഒബാമയുടെ പരാമർശം നേരത്തെ ചർച്ചയായിരുന്നു.

2008 തെരഞ്ഞെടുപ്പ് കാലം മുതല്‍ അബോട്ടാബാദില്‍ അല്‍ ഖ്വയ്ദ തലവന്‍ ഒസാമ ബിന്‍ലാദനെ വധിക്കുന്നത് വരെയുള്ള ഭാഗങ്ങളാണ് എ പ്രോമിസിഡ് ലാന്‍ഡില്‍ പ്രതിപാദിച്ചിരിക്കുന്നത്. രണ്ടു ഭാഗങ്ങളായാണ് പുസ്തകം പുറത്തിറക്കുന്നത്. ഇതിന്റെ ആദ്യഭാഗം ചൊവ്വാഴ്ച വിപണിയില്‍ എത്തി.