ഭുവനേശ്വര്: അത്യാവശ്യ ഘട്ടങ്ങളില് വീടിനു പുറത്തേക്ക് ഇറങ്ങുന്നവര് നിര്ബന്ധമായും മാസ്ക് ധരിക്കണമെന്ന് ഒഡീഷ സര്ക്കാര് .മാസ്ക് ലഭിക്കുന്നില്ലെങ്കില് തുവാലയോ മറ്റ് തുണികളോ ഉപയോഗിച്ച് മൂക്കും വായും മൂടി വേണം പുറത്തിറങ്ങാനെന്നും സര്ക്കാര് വൃത്തങ്ങള് അറിയിച്ചു.
ഇനിയൊരു അറിയിപ്പുണ്ടാകുന്നതു വരെ ഈ നിര്ദേശം കര്ശനമായും പാലിക്കണമെന്നും ആരോഗ്യ വകുപ്പ് അറിയിച്ചിട്ടുണ്ട്. നേരത്തെ, കേരളമുള്പ്പെടെയുള്ള സംസ്ഥാനങ്ങള് മാസ്ക് ധരിക്കുന്നതു കൊണ്ടുള്ള പ്രാധാന്യത്തേക്കുറിച്ച് വ്യക്തമാക്കിയിരുന്നു. ആദ്യ ഘട്ടത്തില് അത്യാവശ്യമുള്ളവരും ആരോഗ്യ പ്രവര്ത്തകരും രോഗികളുമായി അടുത്തിടപഴകുന്നവരും മാത്രം മാസ്ക്് ധരിച്ചാല് മതി എന്നായിരുന്നു നിര്ദേശം.
എന്നാല്, ആഗോള വ്യാപകമായി വൈറസ് ബാധിതരുടെ എണ്ണം കുതിച്ചു കയറിയതോടെയാണ് ലോകാരോഗ്യ സംഘടന മാസ്ക് ധരിക്കേണ്ടതിന്റെ പ്രാധാന്യത്തേക്കുറിച്ച് വിശദീകരിച്ചത്. ഇതോടെ ഇന്ത്യയിലടക്കം അധികാര കേന്ദ്രങ്ങള് ജനങ്ങളോട് നിര്ബന്ധമായും മാസ്ക് ധരിക്കണമെന്ന് ആവശ്യപ്പെടുകയായിരുന്നു.