പാലക്കാട്: കോവിഡ് രോഗ ബാധിതരുടെ എണ്ണം ഉയരുന്ന സാഹചര്യത്തില് ജില്ലയില് തിങ്കളാഴ്ച മുതല് കര്ശന നിയന്ത്രണം തുടങ്ങി. തുടര്ച്ചയായി കോവിഡ് പോസിറ്റീവ് കേസുകള് കൂടുന്നതിനെ തുടര്ന്ന് സെക്ഷന് 144ന്റെ അടിസ്ഥാനത്തിലാണ് ജില്ലയില് മേയ് 31 വരെ കര്ശന നിയന്ത്രണം ഏര്പ്പെടുത്തിയത്. രോഗപ്രതിരോധത്തിന്റെ ഭാഗമായി മാസ്ക് ധരിക്കുക, ശാരീരിക അകലം പാലിക്കുക തുടങ്ങിയ നിബന്ധനകള് കര്ശനമായി പാലിക്കുന്നതിനായാണ് ഉത്തരവ് പുറപ്പെടുവിച്ചതെന്ന് ജില്ല കലക്ടര് അറിയിച്ചു.
ചൊവ്വാഴ്ച മുതല് പൊതുപരീക്ഷകള് തുടങ്ങുന്ന സാഹചര്യത്തില് ജില്ലയില് പരീക്ഷ എഴുതാന് തടസമില്ല. പരീക്ഷ, വിവാഹം, ജോലിക്ക് ഹാജരാകല്, വ്യാപാര സ്ഥാപനങ്ങളുടെ പ്രവര്ത്തനങ്ങള് എന്നിവ നിബന്ധനകളും നിയന്ത്രണങ്ങളും പാലിച്ചു കൊണ്ട് സാധ്യമാണ്. പരീക്ഷ നടത്തിപ്പിനും പരീക്ഷയ്ക്ക് ഹാജരാകുന്നതിനായി പൊതുഗതാഗതത്തെ ആശ്രയിക്കുന്നതിനും തടസമില്ലെന്നും കലക്ടര് അറിയിച്ചു.