പത്തനംതിട്ട: കൊറോണ വൈറസ് സ്ഥിരീകരിച്ച ആളുമായി അടുത്തിടപഴകിയ ശേഷം രോഗ ലക്ഷണങ്ങള് കാണിച്ചതിനെ തുടര്ന്ന് പത്തനംതിട്ട ജനറല് ആശുപത്രിയില് ഐസൊലേഷന് വാര്ഡില് നിരീക്ഷണത്തില് കഴിഞ്ഞിരുന്ന യുവാവ് ചാടിപ്പോയി. തിങ്കളാഴ്ച വൈകുന്നേരം ഏഴ് മണിയോടെയാണ് സംഭവം . ഇയാള്ക്കായി പോലീസ് അന്വേഷണം തുടങ്ങി.
ആരുടെയും ശ്രദ്ധയില്പ്പെടാതെ വാതില് തുറന്ന് പുറത്തിറങ്ങിയ യുവാവ് കടന്നുകളയുകയായിരുന്നു. ഏറെനേരം കഴിഞ്ഞിട്ടും യുവാവിനെ കാണാതിരുന്നതോടെ ആശുപത്രി അധികൃതര് അന്വേഷണം ആരംഭിക്കുകയായിരുന്നു.
ശൗചാലയത്തില് അടക്കം പോയി മടങ്ങിവരാന് ആവശ്യമായ സമയം കഴിഞ്ഞും യുവാവിനെ കാണാതായതോടെയാണ് ആശുപത്രി അധികൃതര് അന്വേഷണം തുടങ്ങിയത്. തുടര്ന്ന് ഇവര് ജില്ലാ ഭരണകൂടത്തെ വിവരം അറിയിച്ചു. ആരോഗ്യവകുപ്പ് അധികൃതര് നടത്തിയ അന്വേഷണത്തിലും യുവാവിനെ കണ്ടെത്താന് സാധിച്ചില്ല. തുടര്ന്ന് ഇയാളുടെ പേരുവിവരങ്ങള് ജില്ലാ ഭരണകൂടം പോലീസിന് കൈമാറി.
യുവാവിനെ എത്രയും വേഗം കണ്ടെത്താനും തിരികെയെത്തിക്കാനുമുള്ള ശ്രമത്തിലാണ് അധികൃതര്. യുവാവിന് ഇതുവരെ കൊറോണ സ്ഥിരീകരിച്ചിട്ടില്ല. രോഗം സ്ഥിരീകരിച്ച ആളുകളുമായി യുവാവ് അടുത്തിടപഴകിയിരുന്നു. തുടര്ന്ന് ചില രോഗലക്ഷണങ്ങളുമായാണ് യുവാവിനെ ഏതാനും ദിവസം മുമ്പ് ആശുപത്രിയില് ഐസൊലേഷന് വാര്ഡില് പ്രവേശിപ്പിച്ചത്.